У поле — з канцэртам
Добры настрой хлебаробам ААТ “Племянны завод “Індустрыя” ў мінулы чацвер падараваў народны калектыў “Зарачанка” Блонскага сельскага Дома культуры. Артысты прыехалі ў поле падчас абедзенага перапынку і прапанавалі камбайнерам канцэрт.
Ён атрымаўся непрацяглым, таму што жніво ў разгары, і часу на доўгі адпачынак няма. Некалькі вясёлых песень у выкананні “Зарачанкі” падбадзёрылі ўсіх прысутных. Камбайнеры шчыра адарылі спявачак апладысментамі, а пасля, як кажуць, з новымі сіламі працягнулі працу.
— Хочацца падзякаваць дырэктару сельгасарганізацыі Ілье Змачынскаму і інжынеру Віталю Бакіноўскаму, якія падтрымалі нашу ініцыятыву і дапамаглі арганізаваць канцэрт, — гаворыць дырэктар Блонскага СДК Алена Харламенкова. — Гэта было першае такое мерапрыемства і дакладна не апошняе. Мы плануем на працягу ўсёй уборачнай кампаніі супрацоў-нічаць з ААТ “Племянны завод “Індустрыя” і яшчэ не раз праспяваць хлебаробам у полі народныя і любімыя песні.
