ААТ “Пухавіцкі камбінат хлебапрадуктаў” гатовы прыняць ураджай.

Работу абсталявання элеватара кантралююць майстры Генадзь Дрокін, Яўген Фіневіч, аператар кіравання Галіна Радзюк.

Жыхары Мар’інай Горкі заўсёды бачаць, калі ў раёне пачынаецца ўборка зерневых, бо на дарозе да элеватара з’яўляецца чарга грузавых машын, кузавы якіх запоўнены збожжам новага ўраджаю. Хутка гэты хвалюючы малюнак жніва можна будзе пабачыць і днём, і ноччу.

А сёння на тэрыторыі элеватара незвычайна ціха і амаль не бачна людзей. Чаму такое зацішша перад адказным і вельмі напружаным для прадпрыемства перыядам работы? На гэтае пытанне адказвае галоўны інжынер ААТ “Пухавіцкі камбінат хлебапрадуктаў” Аляксандр Шывякоў:

—  Элеватар поўнасцю падрыхтаваны да прыёмкі новага ўраджаю збожжавых і зернебабовых культур. Усе асноўныя падрыхтоўчыя работы былі зроблены загадзя, а таму многіх работнікаў, якія будуць задзейнічаны на прыёмцы зерня, адпусцілі ў адпачынак. Вернуцца яны, як толькі жніво будзе пачынацца. Зараз на элеватары застаецца неабходны мінімум абслугоўваючага персаналу.

Сёлета аб’ём работы па прыёмцы ўраджаю зерневых і зернебабовых культур чакаецца вялікі, бо ёмістасці элеватара, разлічанага на захоўванне 100 тысяч тон зерня, амаль пустыя, што абумоўлена ўзросшым попытам на зерне. У мінулым годзе, напрыклад, прыёмка новага ўраджаю пачыналася, калі на элеватары заставалася яшчэ каля 60 тысяч тон зерня папярэдняга ўраджаю.

Тэхнік -лабарант зерневай лабараторыі Таццяна Гурыновіч.

Каб прыёмка зерня сёлета прайшла без збояў і затрымак, усе неабходныя рамонтныя і падрыхтоўчыя работы былі зроблены своечасова: пачышчаны ёмістасці, праверана сістэма тэрмаметрыі, прыведзены ў поўную гатоўнасць усе аўтамабільныя і чыгуначныя кропкі прыёмкі зерня, вагавае і іншае абсталяванне элеватара. Сушыльная гаспадарка — дзве зерневыя сушылкі С-30, якія здольныя апрацоўваць па 30 тон зерня ў гадзіну, а таксама сушылка РД-2х25 з прапускной магутнасцю 40 тон у гадзіну — таксама падрыхтаваны да работы.

Гатова выконваць свае функцыі і зерневая лабараторыя, якая павінна хутка і дакладна правяраць зерне на вільготнасць, засмечанасць і іншыя параметры якасці. Усе прыборы лабараторыі прайшлі паверку.

Першым прымаць зерне новага ўраджаю пачне наш хлебапрыёмны пункт, які   знаходзіцца ў Мар’інай Горцы. Ён прызначаны да прыёмкі рапсу. Яго ўборка павінна пачацца ўжо ў бліжэйшыя дні. Тут маецца сушылка, здольная апрацоўваць 26 тон зерня ў гадзіну, падрыхтаваны сховішчы напольнага захоўвання. ААТ “Пухавіцкі камбінат хлебапрадуктаў” заключыла дагаворы з гаспадаркамі на прыёмку 10 тысяч тон рапсу. Плануецца столькі ж прыняць яго і для ўласных патрэб нашага прадпрыемства з мэтай выкарыстання прадуктаў пераапрацоўкі рапсу на вытворчасці камбікармоў.

Заключаны таксама дагаворы з індывідуальнымі прадпрымальнікамі, якія аказваюць транспартныя паслугі велікагрузнымі аўтамабілямі, на дастаўку зерня з гаспадарак на элеватар. Вазіць зерне будзем і сваім транспартам, для гэтага маецца шэсць МАЗаў з паўпрычэпамі.

Што датычыць персаналу, які будзе забяспечваць кругласутачную прыёмку зерня на элеватары і хлебапрыёмным пункце, то набіраць сезонных рабочых мы сёлета не будзем за выключэннем некаторых спецыяльнасцей. Разлічваем усю гэтую работу выканаць сваімі сіламі, для чаго на яе будуць часова пераведзены некаторыя работнікі з іншых падраздзяленняў і службаў камбіната.

Запісаў Андрэй  МАЗАНІК.