Адрасы і кіламетры Ірыны Доўнар.
Каля 500 адрасоў і каля 10 кіламетраў на дзень даводзіцца пераадольваць Ірыне Доўнар, паштальёну Рудзенскага аддзялення сувязі (на здымку).
— Я працую паштальёнам ужо пяць гадоў, — кажа Ірына. — І люблю тую справу, якой займаюся, бо яна патрэбна людзям. Некаторыя чакаюць не проста газеты, паштоўкі — яны чакаюць чалавека, які прыйдзе ў дом і пагаворыць.
Ірына Доўнар абслугоўвае пасёлак Рудзенск. А яе калегі Валянціна Чыкунова, Зоя Чаржова, Валянціна Гуз і Яніна Ананіч — навакольныя вёскі. Пераадольваюць яшчэ большыя адлегласці, аднак не скардзяцца, бо таксама разумеюць, што іх чакаюць людзі.
У гэтыя пераднавагоднія дні паштальёны традыцыйна дапамагаюць жыхарам Пухавіччыны афармляць падпіску на часопісы і газеты.
— Людзі, якія прывыклі да друкаванага слова, ніколі не забываюць падпісацца, — кажа Ірына. — У ліку папулярных выданняў у жыхароў пасёлка, вядома ж, раённая газета. Без яе, кажуць, не цікава, бо дзе яшчэ можна прачытаць навіны раёна? На старонках якіх выданняў знойдзеш знаёмыя прозвішчы ці фотаздымкі? Я сама заўсёды гартаю старонкі нашай газеты, каб было што расказаць людзям.
Ірына Доўнар, па словах загадчыцы Рудзенскага аддзялення паштовай сувязі Наталлі Сіпач, адна з тых, каму ўдзячныя жыхары неаднаразова пісалі падзякі за працу.
Алена ІВАНОВА.