Гарадок… для цялятак ствараюць на зіму на тэрыторыі комплексу “Новае Сяло”.

Штогод напярэдадні зімовага перыяду на тэрыторыі малочнатаварнага комплексу  “Новае Сяло” сельгасфіліяла “Дрычын” адбываюцца пэўныя перамены. Домікі для цялят, якія знаходзяцца на вуліцы, разам з іх насельнікамі перавозяць у памяшканне фермы. Так жывёла зімуе ў цяпле, а астатнія неабходныя ўмовы для яе камфортнага жыцця ствараюць аператары по вырошчванні цялят і іншыя работнікі комплексу.

Два месяцы таму ў цёплае памяшканне перасялілі  64 цяляткі. Іх даглядае Іна Самусевіч (на здымку 1).  Раней  яна  працавала аператарам машыннага   даення   на   малочнатаварнай ферме “Сетча”.  Нядаўна  перайшла на комплекс.

— На ферме я не толькі  даіла кароў,  але і даглядала цялят, таму вопыт работы з імі  ў мяне быў, — расказвае Іна Іванаўна. — Праца з цялятамі  адказная, бо да іх сапраўды трэба адносіцца як да дзяцей. Калі не любіш гэту справу, то працаваць тут не атрымаецца. І на ферме многае залежыць ад нас, работнікаў. Мы з калегамі  зацікаўлены ў тым, каб усё рабіць своечасова і якасна, бо паказчыкі прывагаў у вазе і захаванасці цялят уплываюць на наш заробак.

Калектыў МТК “Новае Сяло”, які ўзначальвае Максім Пашнін (на здымку 2),  у мінулым годзе паказаў лепшыя вытворчыя вынікі ў гаспадарцы. Сярэднясутачная прывага ў вазе цялят склала 570 грамаў, захаванасць цялят — 96 працэнтаў.  У навагоднюю ноч, дарэчы,  на комплексе нарадзілася двое цялятак.

Кацярына  ВЕРНІКОЎСКАЯ.