Заззялі на сцэне зоркі
Прыемная навіна: Дзед Мароз і Снягурка ўжо ў Мар’інай Горцы. Датэрмінова прыбылі яны ў наш горад для таго, каб уручыць дыпломы лаўрэатаў лепшым удзельнікам музычнага праекта “Запалі сваю зорку”, што доўжыўся цэлы год. Арганізатарамі творчага спаборніцтва выступілі аддзел ідэалагічнай работы, культуры і па справах моладзі райвыканкама і раённы цэнтр культуры. На сцэне РЦК у мінулую сераду адбыўся гала—канцэрт “Калядныя сустрэчы”, які сабраў самых паспяховых удзельнікаў праекта.
Арганізатары гала-канцэрта пастараліся зрабіць так, каб у гледачоў, якія сабраліся ў зале, было поўнае адчуванне каляднай казкі. На сцэне быў прадстаўлены не проста набор канцэртных нумароў, а разгарнулася сапраўдная чароўная гісторыя. Абаяльны дамавёнак Кузя сабраў у чароўны куфэрак усе зоркі, што пакінулі на сцэне таленавітыя выканаўцы на працягу гэтага года, і нёс свой здабытак на баль да Дзеда Мароза і Снягуркі. Па дарозе яму дапамагалі Фея і Папялушка, імкнуліся нашкодзіць разбойнікі і Снежная Каралева. Але ў Кузі ўсё атрымалася, і зоркі зноў заззялі. Арганічна дапоўніла сюжэт і ўпрыгожванне сцэны, аснову якога склала традыцыйная беларуская выцінанка, складзеная ў далікатныя марозныя ўзоры.
І сапраўдны цуд стварылі лаўрэаты музычнага праекта, якія прымалі ўдзел у гала-канцэрце. Шмат пазітыву прынесла Ганна Драчан, якая адкрывала канцэрт. Яе музычнае навагодняе віншаванне настроіла ўсіх на святочны лад. Джазавых нотак у добры настрой дабавілі Паліна Аўсянік і Дар’я Лазарчык. Падтрымалі святочную тэму і іншыя вакалісты: Давід Яўцішын, Ілья Машлякевіч і Лілія Іванова — трыо юных выканаўцаў са Свіслачы, група “Фантазія” з сярэдняй школы №2 горада Мар’іна Горка, Ганна Яфіменка з Мар’інагорскай сярэдняй школы №4, Алена Гілімовіч з Дубраўскай сярэдняй школы і, канешне, Мілана Яцэвіч з РЦК.
Парадавалі і арганізатараў праекта, і гледачоў цудоўнымі танцавальнымі нумарамі харэаграфічныя ансамблі “Тандэм” і “Т-студио” раённага цэнтра культуры, узорныя харэаграфічныя калектывы дзіцячых школ мастацтваў “Імпульс” са Свіслачы і “Дубравушка” з Мар’інай Горкі.
“Запалілі” свае зоркі і музыканты. Шчырымі апладысментамі ўзнагародзілі гледачы гітарыста Уладзіслава Шыкуна. Прыемна было зноў убачыць на сцэне баяніста Паўла Шайтанава. Павел у гэтым годзе закончыў Мар’інагорскі аграрна-тэхнічны каледж, дзе прымаў актыўны ўдзел у мастацкай самадзейнасці, і стаў студэнтам Беларускага аграрна-тэхнічнага ўніверсітэта. Радасна, што малады чалавек не страціў сувязь з раёнам, і ёсць спадзяванне, што мы не раз убачым яго ў канцэртных праграмах.
А яшчэ можна сцвярджаць, што ў нас можа з’явіцца свая Ванэсса Мэй. Менавіта такое ўражанне склалася пасля выступлення скрыпачкі Альдоны Баганік. Яе музычны нумар — нешта зусім новае на канцэртнай сцэне. Сапраўды заззяла яшчэ адна зорка.
Будзем спадзявацца, што праект “Запалі сваю зорку” працягнецца і ў наступным годзе. І новыя таленты парадуюць жыхароў раёна сваёй творчасцю.
Наталля ПАРХОМЧЫК.