На палях працуюць гараджане
Падрыхтоўка палёў пад пасевы ўключае ў сябе розныя віды работ. У іх ліку і сбор камянёў, якімі старажытны ляднік шчодра здобрыў нашы землі. Валуны, якія штогод зноў і зноў “вырастаюць” на палетках, перашкаджаюць працы сельскагаспадарчай тэхнікі. Таму збору камянёў і ўдзяляецца вялікая ўвага. Штогод з гэтай праблемай сельгаспрадпрыемствам дапамагаюць спраўляцца работнікі іншых арганізацый раёна.
Ужо тыдзень з райцэнтра адпраўляюцца аўтобусы з людзьмі ў розныя гаспадаркі раёна. Напрыклад, у мінулы чацвер на адным з палёў эксперыментальнай базы “Зазер’е” працавалі прадстаўнікі райвыканкама, раённай ветэрынарнай станцыі, вучэбна-курсавого камбіната, раённага цэнтра гігіены і эпідэміялогіі. У гаспадарцы паклапаціліся, каб для памочнікаў максімальна аблегчыць нялёгкую працу: самыя вялікія камяні падбіраў каменяўборшчык, прыстасаваны да трактара МТЗ-82, на якім працаваў механізатар Сяргей Тамашэвіч. Ён і расказаў, што поле ў 52 гектары, на якім працавала зборная каманда, рыхтуюць пад ячмень.
На мінулым тыдні 172 прадстаўнікі гарадскіх прадпрыемстваў і арганізацый працавалі на палетках ААТ ”Аграсімвал”, “Ражджэственскае-агра”, “Шацк”, “Зазерка”, “Вецярэвічы”, ПЗ “Індустрыя” і іншых гаспадарак раёна. На 7 красавіка камяні сабраны на 3394 гектарах.
Наталля ПАРХОМЧЫК.