Першы таварыскі матч на сваім лёдзе правяла ў суботу хакейная каманда «Зорка»
Яна выступае за наш раён. Сапернікамі пухаўчан стала каманда з Бабруйска, у якой гуляюць супрацоўнікі органаў Міністэрства па надзвычайных сітуацыях.
— Матч атрымаўся цікавы, — расказвае хакеіст «Зоркі» Міхаіл Бутакоў. — Было прыемна згуляць дома і, да таго ж, стаць мацнейшымі з лікам 6:3. Хакеісты з Бабруйска маюць магчымасць трэніравацца ў лядовым палацы, а, значыць, і больш гуляць у хакей. Мы, на жаль, такой магчымасці не маем.
«Зорка» сапраўды многія свае перамогі сёння атрымлівае дзякуючы таму, што ў камандзе сабраны як вопытныя спартсмены, так і некалькі маладых хакеістаў (Яўген Чумак, Сяргей Аўчарэнка, Сяргей Гаравы), якія выступаюць у аматарскіх лігах. А яшчэ каманда ўпэўнена адчувае сябе таму, што на апошняй мяжы вароты абараняе галкіпер Уладзімір Бондар.
— Хацелася б, каб наша каманда мела будучыню, — кажа Міхаіл Бутакоў. — Але на гэта разлічваць складана, таму што занятак хакеем хоць і безумоўна цікавы і карысны, але далёка не танны. А, значыць, эканамічна не выгадны для недоўгачасовага зімовага сезону. Вось і атрымліваецца, што гуляць у хакей хлапчукі зусім не супраць (прыходзяць на каток пры першай магчымасці), але сур’ёзнай экіпіроўкі ў дзяцей няма, і адпаведна няма перспектывы. Таму пакуль наш хакей трымаецца на ветэранскай камандзе. Для нас, яе членаў, гэта не проста любімая гульня — гэта здароўе, гэта настрой, зносіны, эмоцыі. Мы заўсёды з радасцю і жаданнем перамагаць выходзім на лёд.