Пухавіцкія скалалазы пацвердзілі сваё чэмпіёнства.
У мінулым годзе пухавіцкія скалалазы сталі лепшымі спартсменамі ў рэспубліцы. Падмацоўваць гэты высокі статус нашы землякі пачалі з самага пачатку новага года: у студзені яны заваявалі чарговыя медалі абласных і рэспубліканскіх спаборніцтваў.
Павел Сацута, Кацярына Ганчарэвіч, Павел Астапчык, Максім Гаман, Мікіта Сасноўскі.
Пераможным месцам для пухаўчан стаў Гомель. Тут адбыўся першы этап Кубка Рэспублікі Беларусь па спартыўным скалалазанні ў дысцыпліне боулдэрынг сярод дарослых. Наш раён прадстаўлялі Антон Федарынчык, Уладзімір Найдзёншаў, Аляксей Буры, Марыя Вернікоўская і трэнер Вольга Рак, якая сама з’яўляецца дзеючай спартсменкай. Мужчынскай полове каманды не хапіла некалькі балаў, каб стаць прызёрамі. Выступленне дзяўчат парадавала: Вольга стала чэмпіёнкай, Марыя заняла трэцяе месца.
— Я перамагла двойчы, бо побач са мной на п’едэстале стаяла мая выхаванка Марыя, — дзеліцца ўражаннямі Вольга Рак. — Мы мэтанакіравана рыхтаваліся да гэтых стартаў. Сярод мужчын канкурэнцыя заўсёды высокая. Антону, Вову і Лёшу толькі па 15 гадоў, і магу сказаць, што яны добра выступілі на фоне іншых спартсменаў. Хлопцы трэніруюцца шэсць разоў на тыдзень, у іх ёсць спартыўная мэта і мара, таму іх перамогі дакладна не прымусяць сябе чакаць.
На першынстве Мінскай вобласці па спартыўным скалалазанні ў дысцыплінах цяжкасць і хуткасць на старт выйшлі дзеці 2005-2006 гадоў нараджэння (каманду прадстаўляла пяць чалавек). На гэтых спаборніцтвах нашым землякам упершыню давялося лазіць на хуткасць на эталонных трасах. Гэта трасы сусветнага стандарту, вышыня якіх дасягае 15 метраў. У нашай краіне такіх высокіх скаладромаў пакуль няма, таму эталоннай лічыцца траса вышынёй у 7 метраў.
Вольга Рак.
— Вышыня нашага скаладрома ўсяго 2,5 метра, таму дзецям без належнай падрыхтоўкі было няпроста. У гэтай дысцыпліне мае выхаванцы ўвайшлі ў васьмёрку лепшых. Вынік нядрэнны, але мы можам выступаць лепей, — працягвае трэнер Вольга Рак. — Таму я вырашыла ўнесці пэўныя карэкціроўкі ў план скаладрома, які плануюць пабудаваць у нашым горадзе. Нам трэба таксама мець магчымасць трэніравацца на такіх эталонных трасах.
У лазанні на цяжкасць пухавіччане аказаліся ў ліку лепшых. Мікіта Сасноўскі заняў другое месца, Кацярына Ганчарэвіч — трэцяе.
У пачатку года трэнера асабліва парадаваў Сцяпан Шапашнікаў, які перамог на міжнародных спаборніцтвах у Вільнюсе (Літва). Хлопчык жыве ў Мінску, аднак тры гады таму вырашыў займацца скалалазаннем пад кіраўніцтвам пухавіччанкі Вольгі Рак. Бацькі прывозяць хлопчыка на трэніроўкі ў Мар’іну Горку. Часам Вольга Сяргееўна сустракаецца з юным спартсменам на сталічных скаладромах.
Напрыканцы лютага пухавіцкія скалалазы прымуць удзел у чэмпіянаце Рэспублікі Беларусь. Актыўныя трэніроўкі на скаладроме цэнтра турызму дзяцей і моладзі працягваюцца.
Кацярына ДАБРЫЦКАЯ.
