Радасць свята
Галоўнае навагодняе свята для школьнікаў прайшло ў Мар’інай Горцы ўчора. На яго запрасілі 150 вучняў з 27 устаноў адукацыі раёна: пераможцаў разнастайных конкурсаў, прадметных алімпіяд, выдатнікаў вучобы, актывістаў дзіцячых і маладзёжных арганізацый.
Павіншаваць тых, хто з’яўляецца гонарам сваіх навучальных устаноў, прыйшоў старшыня раённага выканаўчага камітэта Сяргей Ленкавец. Ён падзякаваў юным пухаўчанам за іх працу ў мінулым годзе, а таксама адзначыў, што нічога немагчымага ў нашым жыцці няма, а здзяйсненне ўсіх нашых жаданняў і планаў у наступным залежыць ад нас саміх.
Арганізатары свята падрыхтавалі для яго ўдзельнікаў спектакль па матывах знакамітай казкі “Снежная каралева”. А затым запрасілі ўсіх на баль каля навагодняй ёлкі. Спецыяльна для гэтай часткі многія падрыхтавалі карнавальныя касцюмы. І гэта асабліва парадавала галоўных навагодніх чараўнікоў — Дзеда Мароза і Снягурку.
Па традыцыі, усе ўдзельнікі галоўнай ёлкі раёна атрымалі салодкія падарункі. А да іх — добры настрой, які, як спадзяюцца арганізатары, будзе суправаджаць іх на працягу ўсіх зімовых канікул.
Наталля ПАРХОМЧЫК.