Сын Якуба Коласа адзначыў юбілей на Пухавіччыне
Мерапрыемства, прысвечанае 90-годдзю з дня нараджэння ганаровага грамадзяніна Пухавіцкага раёна Міхася Канстанцінавіча Міцкевіча, прайшло ў мінулую пятніцу ў сярэдняй школе №2 горада Мар’іна Горка. На ім прысутнічаў сам юбіляр разам са сваёй дачкой Марыяй Міхайлаўнай.
Так павялося, што калі аўдыторыі прадстаўляюць Міхася Канстанцінавіча, то часцей за ўсё ў першую чаргу кажуць — малодшы сын Якуба Коласа. Гэта хутчэй для таго, каб напомніць, што гэтага чалавека ўсе добра ведаюць з маленства, бо менавіта ён стаў галоўным героем паэмы “Міхасёвы прыгоды”, якую ў школьныя гады чыталі многія. Тое, што ён сын народнага песняра — акалічнасць важная, але не самая галоўная ў яго біяграфіі. Галоўнае, што ён і сам таленавіты і разнапланавы чалавек, які ў жыцці змог дасягнуць вельмі многае, прычым у самых розных сферах дзейнасці. Яго з дзяцінства прывучылі шмат чытаць, шмат працаваць і даводзіць усё да прафесійнага ўзроўню. Захапіўся стральбой — стаў майстрам спорту па стэндавай стральбе. Захапіўся фатаграфіяй — зрабіў столькі цікавых прафесійных здымкаў, што хапіла бы на некалькі альбомаў. Стаў складаць эпіграмы — яны ўвайшлі ў зборнік “Анталогія беларускай эпіграмы”. Пачаў займацца навукай — стаў доктарам тэхнічных навук, за сваю работу атрымаў Дзяржаўную прэмію БССР. І так ва ўсім. Ён ведае на памяць творы свайго бацькі, і “Новую зямлю” чытае так пранікнёна, як ніхто іншы.
Пра ўсё гэта ў чарговы раз падумалася падчас гэтай сустрэчы. Павіншаваць Міхася Канстанцінавіча прыйшлі вучні і настаўнікі, прадстаўнікі раённага выканаўчага камітэта, работнікі сферы адукацыі і культуры.Прывітальны адрас ад раённага выканаўчага камітэта і раённага Савета дэпутатаў юбіляру ўручыў начальнік аддзела ідэалагічнай работы, культуры і па справах моладзі Леанід Бурлевіч. Міхася Канстанцінавіча павіншавалі начальнік аддзела адукацыі, спорту і турызму райвыканкама Валянціна Андрэева, загадчык цэнтральнай раённай бібліятэкі Наталля Бародзька.
Але самы лепшы падарунак госць атрымаў ад вучняў і настаўнікаў школы. Яны падрыхтавалі па-сапраўднаму літаратурную кампазіцыю, дзе прагучалі ўрыўкі з “Міхасёвых прыгод”, вершы, якія Колас прысвяціў свайму малодшаму сыну. Успомнілі і пра тое, што звязвае сям’ю Коласа з Пухавіччынай. Было відаць, што Міхасю Канстанцінавічу тое, што адбывалася на сцэне, прыносіла са-праўднае задавальненне. У якасці падзякі ён падараваў школе падарунак — адно з лепшых выданняў паэмы “Новая зямля” Якуба Коласа.
У адказ на віншаванні юбіляр падзяліўся з гасцямі вечарыны сваімі сакрэтамі поспеху. Ён не стамляецца паўтараць: калі хочаце нечага дабіцца ў жыцці — па-першае, забудзьце, што такое лянота, а, па-другое, — шмат чытайце.
Міхась Канстанцінавіч часты госць у нашым раёне. Ён добры сябра раённага краязнаўчага музея, дзе дапамагаў ствараць экспазіцыю “Якуб Колас: прырода і людзі роднага краю”. Да юбілейнай вечарыны супрацоўнікі краязнаўчага музея падрыхтавалі буклет, на якім юбіляр ўсім жадаючым пакінуў свой аўтограф.