У ААТ “Аграсімвал” ідзе сяўба азімых.
Апусцелыя пасля лета палеткі чакаюць новае зерне. Наступіў час сяўбы азімых збожжавых культур. І гэта работа зараз актыўна вядзецца ў сельгаспрадпрыемствах раёна.
Напрыканцы мінулага тыдня да сяўбы прыступілі земляробы ААТ “Аграсімвал”. Пакуль на палетках працуе адзін сейбіт — Павел Валасевіч. Для маладога чалавека гэта пяты сельскагаспадарчы сезон.
— Пасяўны агрэгат ад трактара практычна не адчапляю. Здаецца, зусім нядаўна сеяў яравыя культуры, цяпер час азімых, — расказвае Павел Валасевіч. — Тэхніка не падводзіць, пастаянна сачу за яе станам. Работа арганізавана добра, абеды прывозяць у поле. Насенне мне падвозіць вопытны вадзіцель Андрэй Шыкунец. У гаспадарцы ён працуе ўжо 30 гадоў.
Гэтымі днямі Павел Валасевіч сее азімую пшаніцу. Поле, на якім кіпіць работа, ведае добра: сам рыхтаваў тут глебу напярэдадні сяўбы.
— Сёлета азімы клін у гаспадарцы складае 900 гектараў. Сяўбу пачалі з 350 гектараў азімай пшаніцы. Пакуль сеем сваё насенне першай рэпрадукцыі. 11 тон эліты ўжо закупілі, — расказвае галоўны аграном Марыя Цымановіч. — На чарзе — 270 гектараў трыцікале і 280 гектараў жыта. Часткова будзем сеяць сваё насенне, таксама купім насенне эліты.
Павел Валасевіч уключыўся ў сваю чарговую пасяўную кампанію ў пачатку лета. Ён адзін пасеяў 350 гектараў азімага рапсу і 160 гектараў свірэпіцы. На зялёных усходах рапсу цяпер вядзецца хімпраполка. На гэтым відзе работ задзейнічаны Аляксей Ярмоліч і Мікалай Караткевіч.
Напярэдадні сяўбы на палетках пашчыравала нямала земляробаў. Іван Абакунчык праводзіў ворыва, цяпер да гэтага працэсу далучыліся Сяргей Мотуз і Аляксандр Кікот. Пётр Тарасік уносіў фосфарныя і калійныя ўдабрэнні. Анатоль Лабанок працягвае рыхтаваць глебу. Крыху пазней, магчыма, ён далучыцца да працэсу сяўбы.
— Восенню клопатаў у нас значна дадалося. У гэтым годзе да нас далучылі частку былых земляў вытворчага ўчастка “Пухавічы” ААТ “Смалявічы Бройлер” — 500 гектараў. На адным з палёў каля вёскі Загай пасеялі рапс, — працягвае галоўны аграном. — Азімыя культуры традыцыйна даюць большую ўраджайнасць у параўнанні з яравымі. Плануем да пачатку кастрычніка цалкам справіцца з планам азімай сяўбы.
Кацярына ДАБРЫЦКАЯ.