У земляробаў кіпіць работа
На палях ААТ “Шацк” актыўна працягваецца сяўба азімых культур. Насенне рапсу, сурэпіцы і люцэрны ўжо паклалі ў зямлю. У чацвер завяршылі сяўбу азімай пшаніцы, пад якую было адведзена 150 гектараў.
— Гэтыя культуры сеяў механізатар Аляксей Есімчык. Дзякуючы зладжанай рабоце Аляксея Юр’евіча і ўсіх земляробаў мы ўклаліся ў аптымальныя тэрміны сяўбы, — расказвае галоўны аграном Леанід Алізар. — Дзмітрый Дубовік падвозіў насенне да сеялкі. На падрыхтоўцы глебы быў задзейнічаны Васіль Ладуцька. Ворывам займаліся Дзяніс Дубовік і Аляксандр Туміловіч.
Зараз каманда шацкіх земляробаў шчыруе на сяўбе азімага трыцікале і жыта. Гэтымі культурамі трэба засеяць 250 і 300 гектараў адпаведна.Да спісу палявых работ у гаспадарцы ўчора дадалася ўборка кукурузы. 360 гектараў “царыцы палёў” убіраюць на сілас.
— Кукуруза паспела добрая. Плануем нарыхтаваць 7 тысяч тон сіласу, гэта больш, чым у мінулым годзе, — працягвае Леанід Станіслававіч. — У мінулым годзе ў Лявонавічах пабудавалі траншэю ўмяшчальнасцю 3 тысячы тон. Сёлета закладваць зялёны сакавіты корм будзем таксама ў новыя сіласныя траншэі ў Міхалевічах, якія разлічаны на 2 тысячы тон кожная. Іх будаўніцтва завяршаецца.