29 чалавек атрымалі траўмы з-за галалёду
«Дарога нібы каток» — так часта кажуць зімой аўтамабілісты. Але ў апошнія некалькі дзён звыклая фраза стала больш чым актуальнай і для пешаходаў, таму што ўсе адчулі на сабе, што такое галалёд і галалёдзіца адначасова: такі вось выдаўся снежань…
Пакрыты скарынкай лёду асфальт сапраўды нагадваў у выхадныя дні каток. Не памылюся, калі скажу, што па тратуарах месцамі можна было смела ехаць на каньках. Калі ўмееш, вядома.
Сціплая пасыпка пяском сітуацыю практычна не палепшыла: слізгалі ўсе. І калі ў кагосьці ад напружання проста пабалелі мышцы, то камусьці пашанцавала менш. Толькі за нядзелю ў прыёмны пакой звярнуліся па дапамогу з рознымі відамі траўмаў 12 чалавек (1 з іх — дзіця). Усяго з 9 снежня, па дадзеных Мар’інагорскай ЦРБ, былі траўміраваны 29 чалавек (4 дзяцей). Адзін чалавек знаходзіцца на стацыянарным лячэнні.
Што ж, давайце помніць пра тое, што прыйшла зіма, і на вуліцах можа быць слізка. Камунальнікам настаў час прыступіць да зімовых работ. А нам трэба быць асцярожнымі.
Алена ІВАНОВА.
