У мастацкай галерэі адкрылася выстава “Маладыя крылы”.
Мастацкая галерэя раённага краязнаўчага музея рэгулярна праводзіць работу па выяўленні маладых талентаў беларускага мастацтва. У экспазіцыі галерэі на працягу многіх гадоў адкрываюцца персанальныя і супольныя выставы творчай моладзі, якія сведчаць пра неабмежаваныя мастацкія погляды, свабоду пошукаў і эксперыментаў, любоў да родных мясцін і сувязі з сучаснай еўрапейскай культурай. Тут можна паказаць усе новыя здабыткі і ўбачыць сябе без абмежаванняў з аб’ектыўнай, спрыяльнай і эстэтычнай кропкі гледжання.
У апошні час праведзены персанальныя выставы маладых мар’інагорцаў, выпускнікоў
Беларускай дзяржаўнай акадэміі мастацтваў Міхаіла Мішука і Дар’і Раманенка.
Днямі ў мастацкай галерэі адкрылася выстава “Маладыя крылы” студэнтаў кафедры станковага жывапісу Акадэміі мастацтваў. Сярод іх студэнты трэцяга курса Анастасія Міронцава, Дар’я Кудраўцава, Ганна Садоўская, Ся Ін (з Кітая, вучыцца ў акадэміі), Андрэй Ігнаценка, Петэр Воллер (з Галандыі, вучыцца ў акадэміі). Яны дэманструюць свае жывапісныя і графічныя творы. Маладых аўтараў захапляе хараство прыроды, летуценныя мары юнацтва і прага да творчых падарожжаў. У кожнага з іх адчуваецца выдатная прафесійная падрыхтоўка. А самае галоўнае — сваё самастойнае, творчае бачанне мастацкіх задач.
Спадзяёмся, што гэта выстава стане для маладых аўтараў важным этапам у іх творчым развіцці.
Яўген Шунэйка,
кандыдат мастацтвазнаўства, прафесар Беларускай дзяржаўнай акадэміі мастацтваў.