Падведзены вынікі першага этапа раённага спаборніцтва на жніве
Названы лепшыя экіпажы камбайнераў, якія намалацілі больш за тысячу тон зерня, і вадзіцелі, якія пераадолелі тысячную мяжу на адвозцы зерневых культур і насення рапсу.
Павіншаваць перадавікоў прыехалі старшыня Пухавіцкага райвыканкама Сяргей Ленкавец і першы намеснік старшыні райвыканкама, начальнік упраўлення сель-скай гаспадаркі і харчавання Васіль Тупека.
— Вы першыя ў раёне тысячнікі. Хачу падзякаваць вам за няпростую працу, — сказаў Сяргей Дзмітрыевіч. — На нашых палях сёлета нядрэнны ўраджай. Убраць яго трэба хутка і якасна. Спадзяюся, надвор’е будзе нам спрыяць, і ў хуткім часе кожны з вас дадасць да сваіх вынікаў другую тысячу тон зерня.
Цырымонія ўзнагароджання па добрай традыцыі адбылася на хлебнай ніве. Падзякі, лісты падзякі ад старшыні райвыканкама і грашовыя прэміі атрымалі камбайнеры і старшыя камбайнеры ААТ “Голацк” Сяргей Ажаронак, Віктар Гардзіенка, Аляксандр Расолька, Сяргей Стуленкоў і Мікалай Тарасевіч. Есць тысячнікі і ў ПСУП “Дукора-агра” — Мікалай і Андрэй Крукоўскія. Бацька з сынам разам працуюць на жніве больш за 5 гадоў і не ўпершыню аказаліся ў ліку перада-вікоў.
Заслужаныя ўзнагароды атрымалі і вадзіцелі Сяргей Ажаронак з ААТ “Голацк”, Міхаіл Навіцкі з ААТ “Зазерка”, Уладзімір Сянькевіч, якія працуе ў ААТ “Агра-абярэг” і Уладзімір Варона з СХФ “Дрычын” ААТ “Мінскі малочны завод №1”.Падарункі лепшым хлебаробам уручылі таксама старшыня Пухавіцкага райкама прафсаюзаў работнікаў АПК Людміла Арэхоўская, старшыня Пухавіцкага раённага аб’яднанння прафсаюзаў Людміла Гулякевіч, першы сакратар РК ГА “БРСМ” Таццяна Красікава. А гурт “Сяброўкі” Дукорскага сельскага Дома культуры забяспечыў усім удзельнікам святочнай цырымоніі выдатны настрой.
Дарэчы, перадавікоў-тысячнікаў у раёне з кожным днем становіцца больш. Усе лідары жніва атрымаюць заслужаныя ўзнагароды.
