Народны маладзёжны тэатр эстрады “Неба” сёння выступае пад нумарам адзін
Конкурсную праграму фестывалю “Напеў зямлі маёй” адкрываюць прадстаўнікі нашага раёна — народны маладзёжны тэатр эстрады “Неба” Дружненскага сельскага Дома культуры пад кіраўніцтвам Уладзіміра Багунова. Калектыў заявіў аб сабе як аб тэатры ў 2015 годзе. І адразу стаў адметнай з’явай у культурным жыцці раёна. Прафесіяналізм артыстаў ацанілі не толькі гледачы, але і калегі: у пачатку гэтага года ў назве тэатра з’явілася найменне “народны”. Удзельнікі калектыву імкнуцца трымаць марку, здзіўляючы сваіх паклоннікаў энтузіязмам і неверагоднай праца—здольнасцю.
За даволі кароткі час маладзёжны тэатр падрыхтаваў вялікую праграму “Мы лётаем”. Яркія вакальныя і харэаграфічныя нумары, незвычайныя касцюмы, якія ўдзельнікі калектыву ствараюць самі, ацанілі гледачы. Апошні канцэрт, які прайшоў у Доме культуры пасёлка Дружны, сабраў цэлую залу. Пасля яго ў сацыяльных сетках з’явіліся поўныя захаплення водгукі: “Усё вельмі спадабалася… Праведзена каласальная работа, выдатныя нумары, музыка, касцюмы, усё прадумана да дробязяў. Я захапляюся заўсёды тымі, хто не лянуецца, спрабуе сябе ў чымсьці новым, займаецца, акрамя асноўнай работы, яшчэ і такім выдатным хобі, як танцы…“. Ці яшчэ такі: “Дзякуй вам за выдатны настрой і мора пазітыву. Было крута. Поспехаў вам у творчасці”.
Зараз у тэатры працуе 20 чалавек дарослых. А з 1 верасня пры ім адкрылася дзіцячая студыя. Юныя выхаванцы таксама выйдуць на фестывальную сцэну разам са сваімі дарослымі настаўнікамі. Тэатр прадставіць абсалютна новы нумар — папуры з беларускіх народных песень у эстраднай апрацоўцы. Да яго падрыхтавалі новыя касцюмы. Сродкі на набыццё тканіны выдзеліў раённы выканаўчы камітэт.
Дзень 8 кастрычніка стане для ўдзельнікаў народнага маладзёжнага тэатра эстрады “Неба” сапраўдным экзаменам. Апоўдні яны абараняюць гонар раёна на фестывальнай сцэне, а ўвечары даюць у Жлобіне два канцэрты, і білеты на іх ужо поўнасцю раскуплены. Мабыць, так і загортваецца прафесіяналізм — у гатоўнасці выходзіць на сцэну зноў і зноў. Кіраўнік калектыву Уладзімір Багуноў сказаў, што маладыя людзі любяць справу, якую робяць, упэўнены ў сваіх сілах і гатовы працаваць, працаваць і яшчэ раз працаваць.