Пухавіччане занялі ўвесь п’едэстал на Першынстве Рэспублікі Беларусь па спартыўным скалалазанні
Нашы школьнікі занялі ўвесь п’едэстал на Першынстве Рэспублікі Беларусь па спартыўным скалалазанні ў дысцыпліне боулдэрынг, якое прайшло ў Мінску. Антон Федарынчык, Аляксей Буры і Уладзімір Найдзёншаў — прадстаўнікі старэйшай узроставай групы — занялі першае, другое і трэцяе месца адпаведна.
— Уся каманда шчыра віншавала пераможцу і прызёраў, — расказвае трэнер Вольга Рак. — На нашых скалалазаў звярнулі ўвагу ўсе прысутныя. Было прыемна чуць ад калег, што ў Мар’інай Горцы моцная школа скалалазання, якая рыхтуе моцных і перспектыўных спартсменаў.
Медалі і дыпломы з гэтых рэспубліканскіх спаборніцтваў у сваю калекцыю ўзнагарод прывезлі таксама іншыя скалалазы. Марыя Вернікоўская стала сярэбраным прызёрам, Мікіта Сасноўскі і Сцяпан Шапашнікаў — бронзавымі.
На першынстве Рэспублікі Беларусь наш раён прадстаўлялі 20 спартсменаў. Спачатку ім трэба было пераадолець кваліфікацыю, якая ўключала 13 трас. Затым лепшыя скалалазы праходзілі ў фінал. У вырашальным этапе спаборніцтва выступалі 11 пухаўчан. У выніку нашы землякі занялі трэцяе агульнакаманднае месца: іх апярэдзілі толькі скалалазы з Гомеля і Мінска.
— Радасна, што на працягу ўжо пяці гадоў наша каманда знаходзіцца ў прызавой тройцы ў камандных заліках. Аднак і я, і самі дзеці лічым, што можам дасягаць яшчэ лепшых вынікаў, — падсумоўвае трэнер. — Многім фіналістам, асабліва ў малодшай узроставай групе, перашкодзіла хваляванне. Ва ўсіх нашых скалалазаў ёсць вялікі патэнцыял, раскрыць які дапамогуць пастаянныя трэніроўкі. Будзем праводзіць работу над памылкамі і рыхтавацца да чарговых стартаў.
Кацярына ВЕРНІКОЎСКАЯ