Запрашаем на выставу
“Палітра дзіцячай творчасці” — так называецца выстава работ навучэнцаў раённага цэнтра творчасці дзяцей і моладзі “Світанак”, якая зараз працуе ў мастацкай галерэі раённага краязнаўчага музея.
— Для нас гэта мерапрыемства традыцыйнае, — расказала дырэктар цэнтра Вольга Корань.
— Гэта своеасаблівая прапаганда дзіцячай творчасці. Выстава, якая працуе не адзін дзень, дае магчымасць пазнаёміць жыхароў горада і раёна з лепшымі работамі таленавітых дзяцей, прадставіць разнастайныя накірункі дзейнасці творчых гурткоў і аб’яднанняў “Світанка”.
Сёння ў цэнтры працуюць тры студыі, якія маюць найменне “народная”: “Мар’інка”, “Фантазія”, “Кераміка і ганчарства”. Народная лялька і касцюм, праца з бісерам і вязанне кручком, вырабы са скуры і ганчарнае майстэрства — вось толькі некаторыя напрамкі дэкаратыўна-прыкладной творчасці, якія вывучаюць дзеці пад кіраўніцтвам такіх вопытных педагогаў дадатковай адукацыі, як Ларыса Гняўчынская, Таццяна Харытончык, Юлія Валуева і іншыя, — патлумачыла Вольга Аляксандраўна.
Навучэнцы разам з педагогамі займаюцца і праектнай дзейнасцю. На выставе можна пазнаёміцца з праектамі народнай студыі “Фантазія” “Лялька ў беларускай сям’і” і народнай студыі “Кераміка і ганчарства” “Казачны лес” (беларуская гліняная цацка), якія былі прадстаўлены на рэспубліканскім конкурсе праектна-даследчых работ “Цацка” і атрымалі дыпломы III ступені.
Адкрыццё выставы адбылося 22 сакавіка. Цырымонія прайшла вельмі цёпла. Каб настроіць дзяцей, якія прымалі ўдзел у мера-прыемстве, на адпаведны лад, цэнтр дзіцячай творчасці “Світанак” падрыхтаваў некалькі канцэртных нумароў: на імправізаванай пляцоўцы выступалі юныя вакалісты і баяністы. А затым госці змаглі па-знаёміцца з выставай і задаць пытанні педагогам, якія ахвотна расказвалі аб тым, чаму можна навучыцца ў творчых аб’яднаннях “Світанка”.
Выстава працягвае працу, арганізатары запрашаюць наведаць яе і дзяцей, і дарослых.
Наталля ПАРХОМЧЫК.