На палі выехалі першыя камбайны.
На гэтым тыдні некаторыя гаспадаркі прыступілі да ўборкі азімай свірэпіцы на зерне. Першыя камбайны выехалі на палі ААТ “Пухавіцкі райаграсэрвіс”, ААТ “Зазерка”, ААТ “Голацк”, ААТ “Ражджэственскае-агра” і ПСУ “Рудзен-скае”.
Хлебаробы ААТ “Пухавіцкі райаграсэрвіс” ужо справіліся з пастаўленай задачай. Запланаваныя 10 гектараў яны ўбралі за дзень і намалацілі 12,5 тоны зерня. На палетках шчыраваў Аляксандр Сіняўскі, які распачаў свой дзясяты працоўны сезон.
— Справіліся мы хутка, тэхніка і надвор’е не падвялі: якраз паспелі ўбраць свірэпіцу напярэдадні дажджу, — расказаў Аляксандр Вячаслававіч.
Цяпер Аляксандр Сіняўскі дапамагае на сваім камбайне ўбіраць гэтую культуру суседняй гаспадарцы са Старадарожскага раёна. Яшчэ адзін механізатар з райаграсэрвісу — Аляксей Яловы — працуе ў ААТ “Ражджэственскае-агра”.
— Усяго мінулай восенню мы пасеялі 69 гектараў азімай свірэпіцы. 59 гектараў раней убралі на зялёны корм, астатнія пакінулі на зерне. Гэтую багатую бялком культуру вырошчваем штогод, бо яна — добрая падкормка для жывёлы, значна разбаўляе яе рацыён пасля зімы, — расказвае галоўны аграном Дзяніс Адзярыха. — Хутка нашы камбайны зноў накіруюцца на палеткі: спее азімы рапс. Яго мы пасеялі на 404 гектарах.
Кацярына ДАБРЫЦКАЯ.