ПСУ “Рудзенскае”. Перад жнівом камбайны прайшлі выпрабаванне рапсам.

Гаспадаркі раёна завяршаюць уборку азімага рапсу на зерне. З кожным днём павялічваецца агульная колькасць убраных гектараў і намалочаных тон. На раніцу аўторка гэтыя лічбы складалі 4857 гектараў і 6915 тон адпаведна.

Некаторыя сельгасарганізацыі  ўжо  выканалі план па ўборцы гэтай алейнай культуры. У нядзелю з пастаўленай задачай справіліся таксама земляробы ПСУ “Рудзенскае”.

Аляксандр Юдзін.

— Мінулай восенню мы пасеялі 237 гектараў азімага рапсу. Сёлета  зіма дазволіла яму добра перазімаваць, таму ўбіралі ўраджай без страт на ўсёй запланаванай плошчы, — расказвае галоўны аграном гаспадаркі Васіль Васюцінскі. — У мінулым годзе рапс быў запатрабаванай культурай, кошт на яго быў высокі. Вынікамі сёлетняга намалоту не вельмі задаволены. Мы атрымалі сярэднюю ўраджайнасць 17,1 цэнтнера з гектара.

Спачатку рудзенскія земляробы  выконвалі дзяржзаказ па рапсе. Астатнюю частку зерня высушылі і засыпалі  ў свае  засекі.  Атрыманае зерне кіраўніцтва сельгасарганізацыі плануе пазней  выставіць на продаж.

Рапс у ПСУ “Рудзенскае”  ўбралі за шэсць дзён. Пачыналі гэту работу  два камбайны,  пазней  да іх далучыўся яшчэ адзін. На адным з камбайнаў працаваў  Аляксандр Юдзін, астатнія механізатары былі  запрошаны з іншых арганізацый.

— Уборка азімага рапсу — добрая магчымасць праверыць тэхніку  і зернесушыльныя комплексы напярэдадні жніва. Сур’ёзных недахопаў выяўлена  не было, — працягвае Васіль Іванавіч. —  Падкрэслю, што рапс — добры папярэднік для іншых азімых культур.  Вызваленыя з-пад гэтай алейнай расліны ўчасткі мы зараз дыскуем, пазней будзем займацца ворывам, унясеннем удабрэнняў і падрыхтоўкай глебы. На адведзенай плошчы ў асноўным будзем сеяць азімую пшаніцу. Патэнцыял ураджайнасці ў азімых культур значна вышэй, чым у яравых.

Праз лічаныя дні пачнецца жніво. Хутка паспее азімая пшаніца, пасля  наступіць час  азімага трыцікале. Уборку збожжавых будуць пачынаць з тых участкаў, дзе глеба больш лёгкая, бо гэта ўплывае на вегетацыю раслін.

Абмалочваць збожжавыя культуры ў гаспадарцы будуць пяць камбайнаў. Тры з іх ужо прайшлі выпрабаванне рапсам. Завяршаецца падрыхтоўка астатняй збожжаўборачнай тэхнікі. Машыны і каманда вадзіцеляў ужо сфарміраваны.

Дні да старту ўборачнай кампаніі ў гаспадарцы  імкнуцца  выкарыстаць з максімальнай карысцю. Паспелі травы другога ўкосу,  з якіх плануюць нарыхтаваць яшчэ некалькі тон сянажнай масы.  Таксама  земляробам трэба вывезці арганіку на палі, каб пасля ўнесці яе пад сяўбу азімых культур ураджаю 2018 года.

Кацярына ВЕРНІКОЎСКАЯ.