Рамонт школы робіцца сваімі сіламі.
Менавіта такім прынцыпам кіруюцца члены працоўнага калектыву Ананіцкага вучэбна—педагагічнага комплексу дзіцячы—сад сярэдняя школа, калі размова ідзе пра добраўпарадкаванне тэрыторыі ці рамонт школы.
— Лета ў школах традыцыйна лічыцца часам правядзення работ па падрыхтоўцы да новага навучальнага года. Аднак мы не прывыклі рабіць рамонт школы толькі ўлетку: неабходныя работы па падтрыманні парадку праводзім на працягу ўсяго навучальнага года, не адкладаючы на потым, — расказвае дырэктар Таццяна Кавалёва. — І галоўнае — стараемся заўсёды беражліва ставіцца да зробленага.
Не сакрэт, што любы рамонт патрабуе нямала фінансавых сродкаў. Тым больш, рамонт школы, дзе вучацца дзеці. У Ананіцкую школу, напрыклад, штодня на заняткі спяшаюцца каля сотні хлопчыкаў і дзяўчынак. Старайсяне старайся, а за год у школе знойдзецца што рамантаваць ды абнаўляць.
Як жа знайсці сродкі для гэтага? Самае лёгкае — пачакаць, пакуль знойдуцца грошы ў бюджэце. А можна і не чакаць — можна паспрабаваць зарабіць іх самім.
— Ужо не першы год наша навучальная ўстанова супрацоўнічае з цэнтрам занятасці насельніцтва, пры дапамозе якога працуе праект “Швейны свет”, які курыруе настаўніца Алена Харэцкая. Пад яе кіраўніцтвам і з яе дапамогай школьнікі асвойваюць азы шыцця і шыюць бялізну, шторы, якія запатрабаваны і ў нашай школе (асабліва ў дашкольных групах і малодшых класах), і ў бальніцы сястрынскага догляду, і ў іншых школах раёна, — расказвае Таццяна Кавалёва. — Улетку мы штогод арганізуем працоўны лагер. Дзеці некалькі гадзін у дзень прысвячаюць работам па добраўпарадкаванні школы і школьнай тэрыторыі. Зробленае сваімі рукамі, думаю, і берагчы хочацца.
Крыніцай пазабюджэтных сродкаў з’яўляецца таксама збор металалому і макулатуры. Гэта для бацькоў і дзяцей даўно стала традыцыяй.
Акрамя гэтага, калектыў школы цесна супрацоўнічае з бацькамі. Арганізаваны і актыўна дзейнічае апякунскі савет, які добра ведае праблемы навучальнай установы.
— Я вельмі ўдзячна бацькам нашых дзетак за неабыякавасць і зацікаўленасць, — гаворыць Таццяна Іванаўна. — Колькі работы зроблена рукамі бацькоў! У гэтым годзе з іх удзелам мы адрамантавалі дзве групы дзіцячага сада і два класы пачатковай школы. Атрымалася якасна і прыгожа, як быццам працавалі прафесіяналы. Абноўленыя класы выглядаюць больш сучасна, таму што мы адмовіліся ад шпалераў: сцены ва ўсіх класах у далейшым будуць атынкаваны і пафарбаваны. А на вокнах паступова з’яўляюцца жалюзі.
За лета вакол школы абнавілі агароджу, адрамантавалі ганак, малыя архітэктурныя формы на дзіцячых пляцоўках. Сваімі сіламі будуюць альтанку для прагулак малодшых школьнікаў.
— Вялікая ў цэлым работа была зроблена. Я хачу выказаць падзяку членам апякунскага савету і бацькам Наталлі Стасенка, Настассі Шарамет, Сяргею Есіповічу, Святлане Марціновіч, нашаму рабочаму Віктару Сульжыку і кожнаму члену калектыву за ініцыятыву і працу. Гэтыя людзі не лянуюцца, не скардзяцца на недахоп сродкаў, а праяўляюць ініцыятыву і шукаюць выйсце са становішча. І мы яго звычайна знаходзім, бо вельмі хочацца, каб дзеці навучаліся ў камфортных умовах. А тое, што да гэтай справы мы далучаем і саміх вучняў, мае выхаваўчае значэнне, бо вучні тады добра ведаюць, якіх намаганняў каштуе парадак, і вучацца берагчы зробленае на агульную карысць.
Алена ШАНТЫКА.