У Зазерскай школе прайшоў кірмаш па-новаму…
Няма межаў чалавечай фантазіі… Гэта пацвердзілі педагогі Зазерскай сярэдняй школы, выбраўшы новую форму правядзення школьнага кірмашу “Свет непатрэбных рэчаў».
Галоўная мэта кірмашу — каб кожная непатрэбная рэч стала патрэбнай і знайшла свайго гаспадара.
Загадзя прыдумалі новыя ўмоўныя грошы — “кірмашыкі”. Прынёс рэч — атрымаў кірмашык. Чаго толькі не неслі дзеці! Тут і цацкі, і канцылярскія прылады, і кнігі, і дыскі, і адзенне, і шмат чаго яшчэ.
Кірмаш адбыўся ў парку аграгарадка Зазер’е. Удзел у ім прынялі не толькі вучні і педагогі школы, але і жыхары вёскі.
Акрамя кірмашу, у парку разгарнулі сваю дзейнасць дзіцячыя пляцоўкі. Так, на пляцоўцы “Спартыўная” можна было па-ўдзельнічаць у арм-рэслінгу, паскакаць на скакалцы, паспаборнічаць у падняцці гір і бегу ў мяхах.
Хочаце сябе ўпрыгожыць цудоўным малюнкам — да вашай паслугі аквагрым ад майстра-мастака.
Зацятых іграманаў чакала бяспройгрышная латарэя. Каго вабіць верхавая язда, той мог пакатацца на конях пад наглядам вопытнага трэнера.
А вось аматараў смачна паесці чакалі вырабы з цеста і шашлыкі.
Заключным этапам кірмашу стала дыскатэка “Колар-фэст”.
Атрымалася сапраўднае свята, дзе кожны знайшоў сабе занятак па душы. Задавальненне атрымалі і дарослыя, і дзеці.
Час быў укладзены ў мерапрыемства нездарма. Усе зразумелі, наколькі можам працаваць у камандзе, як у кожнага развіты арганізатарскія здольнасці.
Добры настрой дзяцей і дарослых упэўнівае: “Разам мы зможам усё!”
Хочацца выказаць шчырыя словы падзякі людзям, без якіх не атрымаўся б такі цудоўны школьны кірмаш.
Аксана СІНЯЎСКАЯ.