Юбілейныя “Каласавіны” прайшлі на Пухавіччыне.
Сёлета святкуецца 135-годдзе з дня нараджэння славутага беларускага песняра Якуба Коласа. Юбілейныя «Каласавіны» адзначылі ў многіх кутках Беларусі. Традыцыйна свята прайшло і на Пухавіччыне, бо шмат чаго яднае таленавітага пісьменніка з пухавіцкай зямлёй.
У мінулую пятніцу ў вялікай зале раённага цэнтра культуры сабраліся вучні з розных школ раёна. Іх чакала сустрэча з малодшым сынам Якуба Коласа Міхасём Міцкевічам (на здымку).
Міхась Міцкевіч прыехаў разам з беларускімі паэтамі Алесем Камароўскім і Ганадам Чарказянам.
Пачалося мерапрыемства з прагляду фільма, які расказваў, у якіх мястэчках Пухавіччыны любіў бавіць час беларускі класік. Яшчэ цікавей было пачуць назвы знаёмых пухавіцкіх вёсак з вуснаў Міхася Міцкевіча. Міхась Канстанцінавіч распавёў вучням пра тое, як развіваўся талент бацькі, і пра яго першы верш “Вясна”. Пасля на памяць прачытаў некаторыя вершы і эпіграмы Якуба Коласа.
Вікторыя Пунжаль.
Вершы Якуба Коласа перакладзены на многія мовы свету, але, як і ў арыгінале, гучаць заўсёды меладычна і непаўторна. У гэтым пераканаў усіх прысутных паэт Ганад Чарказян, які прачытаў верш “Мой родны кут” на сваёй роднай армянскай мове.
Алесь Камароўскі — зямляк Коласа — не першы раз прымаў удзел у пухавіцкіх “Каласавінах”. Алесь Адамавіч прачытаў свае вершы і прызнаўся, што ў роднай вёсцы Мікалаеўшчына ён заўсёды знаходзіць творчае натхненне.
Удзельнікі віктарыны разам з гасцямі «Каласавін».
Лірычны настрой у “Каласавіны” дабавілі артысты Пухавіцкага РЦК і вучаніца сярэдняй школы №2 горада Мар’іна Горка Вікторыя Пунжаль. Віка — прызёр абласнога этапу рэспубліканскага творчага конкурсу юных чытальнікаў “Жывая класіка”. На свяце дзяўчына прачытала на памяць урывак з паэмы “Новая зямля” “Раніца ў нядзельку”.
“Каласавіны” ў вучняў школ раёна асацыіруюцца з тэматычнай віктарынай, якая традыцыйна праводзіцца напярэдадні свята. Сёлета многія школьнікі таксама адгукнуліся на прапанову паўдзельнічаць. Граматы, падзякі і падарункі пераможцам віктарыны ўручыў дырэктар раённага краязнаўчага музея Аляксандр Прановіч. Пасля прыемнай цырымоніі ўзнагароджання хлопцы і дзяўчаты атрымалі аўтографы Міхася Міцкевіча і зрабілі фотаздымкі з сынам славутага беларускага класіка.
Кацярына ДАБРЫЦКАЯ.
