Наш раён наведала ўкраінская дэлегацыя
Ужо стала добрай традыцыяй у нашым раёне адзначаць дзень нараджэння Лесі Украінкі — выдатнай украінскай паэткі і грамадскага дзеяча. Існуе думка, што яна бывала ў Блоні, якая напачатку мінулага стагоддзя належала сям’і Бонч-Асмалоўскіх. Сёння ў былым сядзібным доме размясціўся раённы краязнаўчы музей, дзе ёсць дакументы, якія сведчаць аб знаёмстве Лесі Украінкі з Варварай Бонч-Асмалоўскай. На Пухавіччыне памятаюць аб гэтым. Таму штогод да нас прыязджаюць прадстаўнікі пасольства Украіны ў Рэспубліцы Беларусь, каб разам адзначыць дзень нараджэння выдатнай паэткі.
У гэтым годзе дэлегацыю ўкраінскіх гасцей узначаліў першы сакратар пасольства Украіны ў Беларусі Іван Башняк. У склад дэлегацыі таксама ўвайшлі старшыня Беларускага грамадскага аб’яднання ўкраінцаў «Ватра» Віктар Гуткоўскі, прадстаўнікі творчага аб’яднання «Крыніца» Маргарыта Кучар і Наталля Папко.
Украінская дэлегацыя наведала мастацкую галерэю раённага краязнаўчага музея, дзе адкрылася выстава, прысвечаная Лесі Украінцы. Тут адбылася сустрэча з работнікамі культуры і членамі раённай ветэранскай арганізацыі. Затым гасцей прымалі ў сярэдняй школе №2 горада Мар’іна Горка. Вучні разам з настаўнікамі падрыхтавалі літаратурную гадзіну, прысвечаную жыццю і творчасці Лесі Украінкі. На мерапрыемстве гучалі вершы паэткі на ўкраінскай, беларускай і рускай мовах.
— Леся хацела, каб у свеце, дзе яна жыла, людзі былі роўныя і шчаслівыя, народы мелі права на сваю волю і праўду, — падкрэсліў Іван Башняк, звяртаючыся да школьнікаў і педагогаў. — Леся Украінка належыць многім народам, як і вялікія беларускія паэты Янка Купала, Якуб Колас, Максім Багдановіч. Іх погляды шмат у чым пераклікаюцца.
У сваім выступленні дыпламат падкрэсліў, што ў украінцаў больш блізкага народа, чым беларусы, няма.
Ён таксама адзначыў, што прадстаўнікам Украіны вельмі прыемна, што ў нашым раёне памятаюць аб Лесі Украінцы. А пачуўшы, як Паліна Аўсянік выконвае песні на ўкраінскай мове на словы вялікай паэткі, выказаў пажаданне ўбачыць яе ў ліку пераможцаў украінскіх песенных конкурсаў.
Наталля ПАРХОМЧЫК.