Прыемныя словы ў свой адрас пачулі жывёлаводы
Працаўнікі ААТ “Зазерка”: Гульміра Марачкоўская, Іван Шрам, Таццяна Бражук, Алеся Румянцава.
У раёне завяршаецца акцыя “Наш жывёлавод”, ініцыятарам якой стаў Беларускі прафсаюз работнікаў аграпрамысловага комплексу. У мінулую пятніцу старшыня раённага камітэта прафсаюза работнікаў АПК Людміла Ленкавец у чарговы раз наведала гаспадаркі раёна, каб уручыць падарункі тым, хто па-сапраўднаму адданы сваёй нялёгкай працы.
З самага ранку Людмілу Васільеўну чакалі ў ААТ “Зазерка”. Разам з кіраўніком гаспадаркі Андрэем Папельскім і старшынёй прафсаюзнага камітэта Людмілай Грабянцовай яна наведала малочнатаварныя фермы “Зазерка”, “Едліна”, “Узляны”. Звяртаючыся да іх работнікаў, Людміла Васільеўна падкрэсліла, што кожны з іх заслугоўвае самыя шчырыя словы па-дзякі за сваю працу.
Сярод жывёлаводаў ААТ “Зазерка”, якія атрымалі падарункі, нямала тых, хто больш за 20 гадоў працуе ў гэтай галіне гаспадаркі. Напрыклад, аператар машыннага даення МТФ “Зазерка” Святлана Клюйко сваёй рабоце аддала без малога 20 гадоў. Жывёлавод Юрый Равека гэты рубеж ужо пера-адолеў. Нямала “старажылаў” і на МТФ “Узляны”: аператар машыннага даення Таццяна Баянава сваёй справе аддала 21 год, жывёлавод па доглядзе цялят Наталля Басалай — 22 гады, слесар Мікалай Басалай — 28 гадоў, а яго калега Андрэй Басалай — крыху больш за 20 гадоў.
А вось на малочнатаварнай ферме ”Едліна” ўся ўвага была прыцягнута да моладзі. Тут Людміла Ленкавец уручыла падарункі ад раённага камітэта прафсаюза работнікаў АПК Таццяне Бражук, Алесі Румянцавай, Гульміры Марачкоўскай. А прафсаюзны камітэт гаспадаркі вырашыў асабліва адзначыць працу жывёлавода Івана Шрама.
Прыемныя словы ў свой адрас пачулі жывёлаводы і ад дырэктара ААТ “Зазерка” Андрэя Папельскага. Ён добра ведае справы на ўсіх фермах, бо бывае там кожны дзень. Для таго, каб наведаць Зазерку, Раўнаполле, Узляны, Едліна і Сяргеевічы, кіраўніку гаспадаркі трэба зрабіць круг у 84 кіламетры. І ён знаходзіць на гэта час. У спіс тых, каго прафсаюзны камітэт гаспадаркі вырашыў ад-значыць падчас правядзення акцыі “Наш жывёлавод”, трапіла 19 чалавек. У сваю чаргу, Андрэй Станіслававіч прыняў рашэнне падтрымаць усіх жывёлаводаў і выдзеліць тым, хто ў гэтым годзе не атрымаў падарункі, грашовую дапамогу.
У РСДУП “Эксперыментальная база “Зазер’е” невялікія сходы калектываў на малочнатаварнай ферме “Зазер’е” і малочнатаварным комплексе “Пярэжыр” прайшлі з удзелам кіраўніка гаспадаркі Дзмітрыя Гайцукевіча і старшыні прафсаюзнага камітэта Ганны Фраловай. Людміла Ленкавец уручыла падзякі і падарункі ад раённага камітэта прафсаюза работнікаў АПК заатэхніку-селекцыянеру Аксане Лагуценка, аператару машыннага даення МТФ “Зазер’е” Алене Басько, жывёлаводу МТК “Пярэжыр” Ганне Кажанковай, загадчыку МТК “Пярэжыр” Сяргею Немчанку. Прафсаюзны камітэт гаспадаркі, у сваю чаргу, вырашыў за добрасумленную працу адзначыць работнікаў жывёлагадоўчай галіны Ірыну Ільюшыну, Сяргея Савіча, Ганну Шаўцову, Ірыну Сачок.
Наталля ПАРХОМЧЫК.
