5 мая адзначаецца Дзень друку
І ў час інфармацыйных тэхналогій для многіх людзей усё яшчэ застаецца добрай звычкай браць у рукі друкаванае выданне і ў вольную хвіліну знаёміцца з цікавымі навінамі, якія падрыхтавалі да друку журналісты. Менавіта з нашых нататкаў у блакноце пачынае свой шлях да чытачоў друкаванае слова. А вось канчаткова яно «выходзіць у свет» у друкарні.
ААТ «Чырвоная зорка» з’яўляецца адным са старэйшых паліграфічных прадпрыемстваў. Яно заснавана ў 1927 годзе. Пачаўшы шмат гадоў таму з выпуску простых этыкетак, сёння друкарня мае сучаснае абсталяванне і працуе практычна ва ўсіх сегментах рынку паліграфіі.
Але для нас друкарня, перш за ўсё, канчатковая інстанцыя выпуску кожнага свежага нумара «Пухавіцкіх навін». Напярэдадні прафесійнага свята мне ўдалося пабываць у цэхах і паназіраць у прысутнасці дырэктара фабрыкі Уладзіміра Лобача, як выходзіць у свет новы нумар нашай газеты.
Друкары час ад часу даставалі з патоку аддрукаванай прадукцыі выпадковыя нумары і правяралі якасць: прэтэнзій не было. Усё чарговы раз прайшло добра.
— На працягу 15 гадоў я друкую «Пухавіцкія навіны», — расказвае першы друкар Яўген Рудкоўскі. — Калі б трэба было адказаць з прафесійнага пункту гледжання на пытанне аб газетах-любімчыках, то для мяне ваша раёнка — адна з іх.
Мы ўдзячны калектыву ААТ «Чырвоная зорка» за сяброўства, за агульную работу. Каля 30 гадоў наша раённая газета прыходзіць да чытачоў з гэтай друкарні. Мы ж адказваем за напаўняльнасць газеты, якую імкнемся рабіць цікавай, змястоўнай, патрэбнай для кожнага нашага падпісчыка. Таму менавіта з калектывам друкарні мы дзелім сёння і наша прафесійнае свята.
Алена ШАНТЫКА.