Развітанне з роднай школай
Сёння — другі дзень летніх канікулаў. Большасць школьнікаў ужо адпачывае. А вось выпускнікам 9-х і 11-х класаў пакуль не да адпачынку: яны здаюць выпускныя экзамены. Для 289 юных пухавіччан экзамены апошнія, а для 594 дзевяцікласнікаў — першыя. Аднак сярод гэтых дзяцей будзе нямала тых, хто пасля школьных будзе здаваць і ўступныя экзамены ў каледжы і ліцэі. Таму апошні школьны званок, што празвінеў у школах раёна ў сераду, стаў развітальным не толькі для адзінаццацікласнікаў.
— Наша школа дае дзецям трывалыя веды, — сказала на апошняй лінейцы дырэктар Свіслацкай СШ Таццяна Селівонец. — І не дзіўна, што нашы хлопчыкі і дзяўчынкі штогод паступаюць у рэспубліканскі і абласны ліцэі, каледжы. У мінулым годзе, напрыклад, ліцэістамі стала 15 чалавек. А, між іншым, конкурсы і прахадныя балы ў абласны ліцэй даволі высокія.
Таццяна Рыгораўна падзякавала настаўніцкаму калектыву за плённую працу, а раённаму выканаўчаму камітэту і спонсарам (ЗАТ “Август-Бел” і ААТ “Завод горнага воску”) за ўмацаванне матэрыяльна-тэхнічнай базы школы і цеснае супрацоўніцтва ў рамках цікавых школьных праектаў.
Поспехі вучняў школы адзначыла і начальнік цэнтра інавацыйнага развіцця адукацыйнай практыкі Мінскага абласнога інстытута развіцця адукацыі Таццяна Праліска. Свіслацкія школьнікі пастаянна становяцца пераможцамі розных навукова-даследчых конкурсаў, дыстанцыйных алімпіяд.
Апошнія ўзнагароды, што былі атрыманы напярэдадні заканчэння навучальнага года, дзецям уручылі на ўрачыстай лінейцы. Былі традыцыйна названы і адзначаны прызамі самыя спартыўныя, актыўныя і самыя паспяховыя ў вучобе класы школы.
Старшыня раённага выканаўчага камітэта Сяргей Ленкавец пажадаў школьнікам прадуктыўнага і вясёлага адпачынку і паабяцаў, што дарослыя паклапоцяцца, каб да пачатку наступнага навучальнага года ўсе школы былі на сто працэнтаў гатовы прыняць вучняў. А вось выпускнікоў папрасіў не забываць ні родную школу, ні сваю малую радзіму, наш раён, які адчувае патрэбу ў адукаваных спецыялістах.
Апошні званок далі лепшыя вучні — Мікіта Еўтушэнка і Ева Змушко.
Алена ІВАНОВА.
