Механізатары ААТ “Агра-Абярэг” працягваюць нарыхтоўку сенажу

Моцная і зладжаная каманда штогод праводзіць корманарыхтоўчую кампанію ў ААТАграАбярэг”. У гэтым годзе гаспадарка разлічвае нарыхтаваць 13900 тон сенажу. З гэтым планам (самым вялікім у раёне) ужо справіліся на 35 працэнтаў. Механізатары разлічваюць, што да завяршэння першага ўкосу (5 чэрвеня) гэтая лічба дасягне 50 працэнтаў.

Традыцыйна ў корманарыхтоўчае звяно ўключаны Фёдар Хадыка (на здымку). Ён працуе на КВК-800, штодзень здрабняе каля 300 тон зялёнай масы. Фёдар Аляксандравіч неаднаразова ўваходзіў у лік лепшых механізатараў падчас корманарыхтоўкі.

У пачатку сезона на “Ягуары” гэтай работай быў заняты Сяргей Лабус. Некалькі дзён таму яго змяніў Мікалай Паўлоўскі. Скошаную травяную масу ў валкі зграбае Аляксандр Ладуцька.

— На касьбе задзейнічаны Мікалай Ляпёшка і Іосіф Вільтоўскі. Адвозяць зялёную масу  вадзіцелі Уладзімір Гінько, Аляксандр Верасовіч, Уладзімір Асіпук, Андрэй Лабус, Юрый Есімчык, Уладзімір Хадыка, — расказвае галоўны аграном гаспадаркі Раіса Есімчык. — Трамбоўка на сянажных траншэях вядзецца кругласутачна.  1100 тон сенажу ўжо заклалі каля фермы ў Дудзічах, 800  тон — каля  Наваполля, 740 тон — у Азярычыне,  800 тон — у Крыстамполлі. За выхадныя плануем закласці яшчэ адну яму ў Азярычыне. З пачатку тыдня будзем закладваць кармы ў Бахаравічах.

Разам з тым у гаспадарцы працягваюць нарыхтоўку сенажу ў палімернай плёнцы.  На прэс-падборшчыку працуе Віктар Граблюк.

Кацярына  ДАБРЫЦКАЯ.

Добавить комментарий

Ваш e-mail не будет опубликован. Обязательные поля помечены *