Свята прыйшло ў Лешніцу
Вёска Лешніца — месца ў нашым раёне знакавае. Тут у 1918 годзе нарадзіўся паэт, заслужаны дзеяч культуры Беларускай ССР, аўтар верша “Радзіма мая дарагая” Алесь Бачыла. Менавіта свайму знакамітаму земляку мясцовыя жыхары прысвяцілі свята вёскі, якое адбылося 21 ліпеня.
— Рыхтавацца да яго мы пачалі яшчэ з восені мінулага года, — расказала адна з арганізатараў мерапрыемства Таццяна Бублікава. — Першае, што зрабілі — звярнуліся ў Саюз пісьменнікаў Беларусі і прапанавалі адзначыць стогадовы юбілей Алеся Бачылы. У працэсе супрацоўніцтва нарадзілася ідэя падзяліць святкаванне на два этапы. Першым стаў літаратурны конкурс “Радзіма мая дарагая”, у якім запрасілі прыняць удзел беларускіх паэтаў. Другую частку было вырашана правесці ўлетку на радзіме Алеся Бачылы ў вёсцы Лешніца.
На свята прыехала шмат ганаровых гасцей. Пачэснае месца сярод іх займалі родныя паэта — сын Мікалай, які зараз жыве ў Маскве, унук Арцём і праўнучка Марына.
Мікалай Аляксандравіч выказаў падзяку арганізатарам свята і жыхарам вёскі за тое, што яны зберагаюць памяць пра яго бацьку. Ён падкрэсліў, што для Алеся Бачылы, як і для многіх людзей, якія прайшлі вайну, словы “любоў да Радзімы” не былі проста словамі — ён з гэтым жыў. Паэт з вялікай павагай адносіўся да людзей і выклікаў да сябе давер у іншых.
Арцём нарадзіўся ўжо пасля таго, як яго знакаміты дзед пайшоў з жыцця. У Лешніцу са сваёй сям’ёй ён прыехаў упершыню. І быў уражаны тым, колькі людзей ведае пра Алеся Бачылу. Арцём лічыць, што ад дзеда яму перадалася любоў да беларускай мовы, хаця з гуманітарнай сферай ён ніяк не звязаны (па прафесіі ён інжынер).
Цікаўнасць у мясцовых жыхароў выклікалі выставы кніг і дакументаў, якія падрыхтавалі цэнтральная раённая бібліятэка і раённы краязнаўчы музей. І кіраўніку раённай сеткі публічных бібліятэк Але Андросавай, і дырэктару музея Аляксандру Прановічу давялося адказаць на шматлікія пытанні, якія ўзнікалі і ў людзей сталага ўзросту, і ў моладзі.
Не забыліся мясцовыя жыхары і пра іншых сваіх знакамітых землякоў. У спецыяльна зробленай да свята насценнай газеце можна было прачытаць інфармацыю пра 16 ураджэнцаў Лешніцы, якімі ганарацца аднавяскоўцы. Сярод іх і навукоўцы, і юрысты, і будаўнікі, і проста актыўныя і неабыякавыя людзі.
Імёны многіх з іх называлі і падчас святочнай праграмы, на якую запрасілі ўсіх жыхароў не толькі вёскі, але і наваколля. Удзельнікаў свята віталі намеснік начальніка аддзела ідэалагічнай работы, культуры і па справах моладзі райвыканкама Наталля Бародзька, старшыня Голацкага сельвыканкама Віктар Малуха.
Сельскі выканаўчы камітэт аказаў дапамогу ў набыцці падарункаў для тых жыхароў вёскі, якіх арганізацыйны камітэт вылучыў як самых-самых, а Віктар Генадзьевіч узнагародзіў іх. У намінацыі “Старэйшы жыхар вёскі” падарунак атрымала Марыя Ладуцька. Лепшым пчалаводам сярод аднавяскоўцаў быў прызнаны Аляксандр Асташонак, а лепшым садаводам — Віктар Камлюк. Лепшай у вёсцы была названа гаспадарка Людмілы Жуковіч, а вось лепшай гаспадыняй стала Святлана Дземідовіч. За актыўны ўдзел у жыцці вёскі ўзнагароды атрымалі Віктар Ажаронак і Валянціна Ладуцька.
Валерый Мазоўка быў прызнаны “Чалавекам Года малой радзімы”. Ён — заслужаны будаўнік Рэспублікі Беларусь, старшыня Назіральнага савета ЗАТ «Трэст Прамбуд». І ён шмат зрабіў для таго, каб гэтае свята адбылося.
Як і абяцалі, адзначыць разам з жыхарамі вёскі юбілей Алеся Бачылы прыехалі прадстаўнікі Саюза пісьменнікаў Беларусі — пераможцы конкурсу “Радзіма мая дарагая”, вынікі якога былі падве-дзены на XXV Мінскай міжнароднай кніжнай выставе-кірмашы. Удзельнікаў свята віталі намеснік старшыні грамадскага аб’яднання «Саюз пісьменнікаў Беларусі» Алена Стэльмах і старшыня Мінскага абласнога аддзялення Саюза пісьменнікаў Святлана Быкава, паэт Канстанцін Цыбульскі. У выкананні гасцей са сцэны гучалі вершы, прысвечаныя малой радзіме. Творы самога Алеся Бачылы прачыталі вучні Зазерскай сярэдняй школы, якія да дня нараджэння паэта падрыхтавалі літаратурна-музычную кампазіцыю.
Падтрымаць святочны настрой дапамагалі вядомыя беларускія выканаўцы: заслужаны артыст Рэспублікі Беларусь Валерый Дайнэка, салісты заслужанага калектыву Рэспублікі Беларусь, ансамбля народнай музыкі “Бяседа”, заслужаная артыстка Беларусі Святлана Суседчык і Валянцін Кірыленка, фіналіст конкурсу “Талент краіны” Раман Кірыленка. Цёпла сустракалі жыхары Лешніцы шоу казачай песні і танца “Маме падабаецца”, цыганскі ансамбль “Алюр”, а таксама юных выканаўцаў, якія падрыхтавалі свае музычныя падарункі жыхарам вёскі.
Зямля, на якой нарадзіўся, заўсёды прыцягвае да сябе. Гэта добра адчувалася падчас свята ў Лешніцы. У вёсцы зараз пастаянна пражывае два дзясяткі чалавек, а на святочнай паляне сабралася больш за сотню. І ўсіх іх аб’яднала малая радзіма.
Наталля ПАРХОМЧЫК.
Алесь БАЧЫЛА
ЛЕШНІЦА
Без цябе нават мара здаецца бяскрылаю,
Без цябе і ў жыцці не пакінуў бы след…
Я не знаю, ці птушкі вяртаюцца з выраю
У тыя гнёзды, адкуль выпраўляліся ў свет.
Я ж цябе, быццам матчынай ласкі, трымаюся.
І ў якіх ні блукаў бы далёкіх краях,
Дзе б ні быў, а заўсёды ў пачуццях вяртаюся
Да цябе, мая Лешніца, вёска мая;
Да сваіх землякоў, з кім быў лёсам заручаны,
Дарагіх успамінаў дзіцячай пары…
Мне і сёння паводкай шуміць Закаблучанка,
Шэпчуць гонкія сосны з Высокай гары.
І здаецца, ізноў наўскасяк, запацелы, я
То спакойна, то ўподбег мінаю жыты
І нырцую ў гушчэчу грыбную Гарэлага,
Дзе гучыш пераклічкамі, Лешніца, ты;
Дзе асіннікі ўсе і ўсе ельнікі зведаны…
А як вечар задрэмле ў туманных лугах,
«Летня ночка каротка…» — выцягвае Хведарка,
Аж чуваць гэта песня ў зарэчных Барках.
Заміраюць над Свіслаччу вольхі пахілыя,
І не могуць спакойна ўстаяць чараты…
І бяжыш, о дзяцінства далёкае, мілае,
Хлапчуком басаногім па ржэўніку ты.
Пазайздрошчу табе, і прыветна ўсміхаюся
І дарогам, і нівам, і ціхім гаям,
І малым ручайком веснавым уліваюся
У твае чыстыя воды, радзіма мая.