Аператар зернесушыльнай устаноўкі Аляксандр Хадыка з ААТ “Голацк” — сярод лепшых у раёне па выніках жніва
Праз зернетакі за сезон праходзяць тысячы тон збожжа. Перад людзьмі, якія там працуюць, стаіць адказная задача: зберагчы ўраджай, дзеля якога цэлы год шчыравалі хлебаробы.
Аператар зернесушыльнай устаноўкі КЗСВ-30 ААТ “Голацк” Аляксандр Хадыка штогод сярод лепшых у раёне. Сёлета на яго рахунку 7711 тон. Гэта першы вынік у раёне і трэці ў вобласці. У суботу Аляксандр Іванавіч будзе прадстаўляць Пухавіччыну на абласных “Дажынках” у Мядзелі.
Аляксандр Хадыка прыйшоў у гаспадарку ў 2002 годзе. Працуе ён вартаўніком на мехмайстэрні, але ўжо больш за дзесяць гадоў падчас гарачага сезона жніва задзейнічаны на зернетаку.
— Гэты зернесушыльны комплекс высушвае 30 тон збожжа за гадзіну. Устаноўка моцная і надзейная. Сёлета не падвяла, працавала кругласутачна, — расказвае Аляксандр Іванавіч. — Напярэдадні сезона мы з калегамі самастойна займаліся рамонтам абсталявання.
Аляксандр Хадыка пад-крэсліў, што вынік яго працы залежыць ад работы ўсёй каманды земляробаў. Падрыхтоўка глебы, сяўба, унясенне ўдабрэнняў і ўборка збожжавых — кожны механізатар прыклаў свае намаганні дзеля высокага намалоту. Дарэчы, гаспадарка штогод па гэтых паказчыках з’яўляецца адным з лідараў у раёне. Сёлета засекі сельгасарганізацыі папоўніліся 8370 тонамі збожжа новага ўраджаю.
Аляксандр Іванавіч працягвае працоўную дынастыю ў ААТ “Голацк”. Яго бацька быў спачатку вадзіцелем, пасля жывёлаводам. Маці ўсё жыццё працавала аператарам машыннага даення.
— Гэта старанны, адказны і добрасумленны чалавек, якому можна даверыць любую работу, — гаворыць пра Аляксандра Хадыку старшыня прафсаюзнага камітэта гаспадаркі Зоя Кікаць. — Падчас унясення вадкіх азотных удабрэнняў КАС ён працуе аператарам мотапомпы.
Сезон работы на ЗСК для Аляксандра Хадыкі яшчэ не скончаны. Цяпер ён дапрацоўвае да патрэбнай кандыцыі зерне кукурузы.
Кацярына ДАБРЫЦКАЯ.