Старшыня райвыканкама Сяргей Ленкавец правёў прыём грамадзян у аграгарадку Вецярэвічы
Вясковыя людзі ў многіх пытаннях больш цярплівыя, чым гараджане. Гэта адчуваецца кожны раз, калі прыём грамадзян праводзіць старшыня раённага выканаўчага камітэта Сяргей Ленкавец. Жыхары сталіцы, у асноўным дачнікі, гатовы перакласці на мясцовую ўладу не толькі агульныя, але і свае асабістыя клопаты. На думку некаторых, ім усе і ўсё абавязаны. Вяскоўцы, як правіла, прыходзяць са сваёй праблемай да старшыні райвыканкама, калі ўжо, як кажуць, набалела.
На мінулым тыдні Сяргей Дзмітрыевіч праводзіў прыём грамадзян у аграгарадку Вецярэвічы. Са сваімі пытаннямі да кіраўніка раёна прыйшлі пяцёра чалавек, і гаварылі яны пра адны і тыя ж праблемы.
Адна з галоўных — якасць вады. І скардзяцца па гэтым пытанні вяскоўцы не першы раз. Дырэктар УП “Жылцепласэрвіс“ КГ Пухавіцкага раёна Іосіф Кучко расказаў, што сёлета ў Вецярэвічах камунальнікі тройчы прамывалі вода-праводныя трубы. Аднак людзі лічаць, што праблема застаецца. Сяргей Дзмітрыевіч растлумачыў, што яна існуе і ў іншых населеных пунктах раёна, і вырашыць яе не так проста. Ён даручыў дырэктару камунальнага прадпрыемства да 10 кастрычніка правесці прамыўку труб яшчэ раз у прысутнасці жыхароў вёскі, якія сумняваюцца ў якасці раней праведзеных работ.
Да 15 кастрычніка неабходна прывесці ў парадак вуліцу, на якой у мінулым годзе было пашкоджана асфальтавае пакрыццё ў час пракладкі водаправода. Старшыня райвыканкама засяродзіў увагу на тым, што гэтыя работы трэба было выканаць своечасова, а не чакаць, пакуль людзі пачнуць скардзіцца.
Шмат нараканняў у жыхароў вёскі выклікае магазін раённага спажывецкага таварыства. Людзі гаварылі, што там вельмі малы асартымент тавараў, няма самага неабходнага: цукру, запалак. Амаль год не паступаюць у продаж цыгарэты.
Сяргей Дзмітрыевіч наведаў магазін. З-за абмежаванай колькасці тавараў яго перагарадзілі, плошчу зменшылі ўдвая. І гэта не здзіўляе, бо магазін і зараз выглядае пустым. На паліцах невялікая колькасць прамысловых і гаспадарчых тавараў. Сапраўды, у продажы адсутнічалі запалкі і цукар. Людзі гаварылі аб тым, што не заўсёды можна купіць хлеб. Затое вяскоўцам прапаноў-валі цыбулю, буракі, капусту, моркву, часнок, — тое, што ёсць практычна ў кожным агародзе. І ў гэтым віна не прадаўца, які з’яўляецца маладым спецыялістам. Раённае спажывецкае таварыства недапрацоўвае ў забеспячэнні таварамі сваіх магазінаў, якіх, дарэчы, у раёне засталося ўсяго 15. А ў былыя часы было больш за сотню!
Старшыня райвыканкама даручыў кіраўніцтву раённага спажывецкага таварыства звярнуць увагу на стан вясковых магазінаў і прыняць меры па забеспячэнні іх таварамі.
Існуе ў Вецярэвічах і праблема банкаўскага абслугоўвання. Гэтыя функцыі перададзены паштоваму аддзяленню, якое працуе палову дня. Не заўсёды можна атрымаць грошы па банкаўскай картцы. Гэта пытанне было ўзята на кантроль.
Праводзячы прыёмы грамадзян ў сельскіх населеных пунктах, старшыня райвыканкама заўсёды знаёміцца з работай прадпрыемстваў і арганізацый, устаноў сацыяльнай сферы. У Вецярэвічах ён наведаў мясцовую школу і дзіцячы сад, пагутарыў з педагогамі, тэхнічнымі работнікамі. Сяргей Дзмітрыевіч адзначыў, што ўстановы адукацыі прыведзены ў парадак, аднак тут існуе адна вялікая, характэрная для многіх сельскіх населеных пунктаў праблема: скарачаецца колькасць вучняў і выхаванцаў дзіцячых дашкольных устаноў. У школе ў Вецярэвічах зараз 46 вучняў, пры тым, што яна разлічана больш як на 300 месцаў, у дзіцячым садку — 19 дзяцей. І, магчыма, дзіцячы садок у перспектыве будзе працаваць пад дахам школы.
Вольга САВАСЦЮК.
