Камунальнікі Пухавіччыны гатовы да зімовых клопатаў
Пра тое, што гэты чалавек ніколі не будзе глядзець на гадзіннік у чаканні канца працоўнага часу, ведаюць у калектыве УП «Жылцепласэрвіс» КГ многія, таму што вадзіцель пагрузчыка Аляксей Куль (на здымку) з тых людзей, якія прывыклі любую справу не кідаць недаробленай. Гэта добрая рыса характару для любога чалавека. Тым больш, для таго, ад чыёй працы залежыць камфорт іншых людзей. А ў камунальнікаў уся праца такая.
— Аляксей найчасцей бывае заняты на ліквідацыі аварыйных сітуацый, якія здараюцца на цепла- і водаправодных сетках, што абслугоўваюцца прадпрыемствам, а таксама на перакладцы і рамонце гэтых сетак, — гаворыць Андрэй Кардаш, начальнік транспартнага ўчастка УП «Жылцепласэрвіс» КГ. — Даволі часта пагрузчык прыцягваецца для выканання работ па добраўпарадкаванні. У гэтым годзе, напрыклад, быў галоўным памочнікам падчас асфальтавання тратуараў.
А ўзімку без пагрузчыка не абысціся пры пагрузцы пясчана-салянай сумесі. Да гэтых работ, магчыма, Аляксею прыйдзецца прыступіць зусім хутка, таму што сіноптыкі прагназуюць наступленне зімовага надвор’я.
— Да зімы мы практычна цалкам гатовы, — працягвае Андрэй Кардаш. — Тэхніка ў нашым распараджэнні тая, што была і раней. Усяго 37 адзінак трактароў, пагрузчыкаў, пескараскідвальнікаў. Будзем старацца зрабіць усё, каб яны заўсёды былі гатовы выйсці на маршрут, таму што колькасць тэхнікі не дазваляе ў асабліва непагодлівыя дні адчуваць сябе вельмі ўпэўнена.
Для падсыпкі дарог камунальнікамі нарыхтавана каля 1700 тон пясчана-салянай сумесі. Пры неабходнасці запас можна будзе папоўніць.
Нягледзячы на тое, што на календары яшчэ не зіма, камунальнікі кажуць, што ўжо гатовы ў любы момант прыступіць і да сваіх зімовых абавязкаў па ўтрыманні ў належным стане дарог і вуліц.
Алена ІВАНОВА.