У Пухавіцкім раёне адбыліся спаборніцтвы ў рамках акцыі «Міншчына спартыўная»
Выхадныя дні для многіх юных пухавіччан атрымаліся насычанымі: у раёне прайшлі масавыя спартыўныя спаборніцтвы ў рамках акцыі «Міншчына спартыўная».
Найбольш прадстаўнічымі сталі лыжныя старты, якія былі арганізаваны для школьнікаў на базе фізкультурна-аздараўленчага цэнтра «Вікторыя». Каманды лыжнікаў з усіх школ раёна сабраліся на лыжні, каб выявіць мацнейшых і сфарміраваць каманду для ўдзелу ў абласных спаборніцтвах.
Лепшымі ў агульнакамандным заліку (у сваіх падгрупах) па выніках забегаў сталі навучэнцы ДУА «Сярэдняя школа № 3 горада Мар’іна Горка», «Блонская сярэдняя школа», «Турынскі НПК дзіцячы сад-базавая школа». Другія і трэція месцы занялі каманды ДУА «Мар’інагорскі НПК дзіцячы сад-сярэдняя школа», «Ананіцкі НПК дзіцячы сад-сярэдняя школа», «Дрычынская базавая школа», а таксама ДУА «Мар’інагорская гімназія», «Пухавіцкая сярэдняя школа», «Бор-Слабадскі НПК дзіцячы сад-базавая школа».
Лепшыя вынікі паказалі ў індывідуальным заліку Андрэй Макроў, Яўген Макараў, Кацярына Зязюльчык (СШ №3), Кірыл Халадзінскі (Дрычынская БШ), Андрэй Еўсіенка (Дукорскі НПК), Уладзіслаў Саўчык, Аліна Саўчык, Аліна Прахарчук (Турынскі НПК), Аляксандр Шклярык, Ульяна Анкудовіч (Блонская СШ), Паліна Вашкевіч (Мар’інагорская гімназія), Вікторыя Гнядзько (Пухавіцкая СШ).
А на гарадскім стадыёне ва ўсю разгарнуліся святочныя «Зімовыя пацехі», якія арганізавалі для дзяцей і бацькоў упраўленне па адукацыі, спорце і турызме райвыканкама, ФОЦ «Вікторыя» і РК БРСМ.
Усіх, хто ў выхадны зімовы дзень не пажадаў заставацца дома, сустракалі казачныя персанажы Дзед Мароз, Снягурка і Снегавік. Яны не проста павіншавалі ўдзельнікаў святочных пацех са Старым Новым годам, але і падрыхтавалі вялікую забаўляльна-спаборніцкую праграму. Дзеці і бацькі ўдзельнічалі ў васьмі зімовых эстафетах, праходзілі снежныя лабірынты, пераадольвалі розныя перашкоды. Усім было цікава і весела. У якасці ўзнагарод кожны атрымаў салодкія прызы. А жадаючыя пакатацца на каньках скарысталіся ў гэты дзень правам бясплатнага пракату інвентару.
Такія спаборніцтвы запланаваны на ўсе бліжэйшыя нядзельныя дні.
Алена ШАНТЫКА.
