Вучаніца Голацкага НПК дзіцячы сад-СШ атрымала прыз сімпатыі гледачоў
У Дзяржаўным літаратурна-мемарыяльным музеі Якуба Коласа падвялі вынікі рэспубліканскага конкурсу для школьнікаў “У словах-вобразах, песнях вольнаплынных…”. Ён быў прымеркаваны да 100-годдзя першага выдання паэмы Я. Коласа “Сымон-музыка” і 95-годдзя паэмы “Новая зямля”. У творчым спаборніцтве прымалі ўдзел вучні ўсёй Беларусі. Яны даслалі больш за 1670 работ. Сярод лепшых аказаўся малюнак вучаніцы Голацкага НПК дзіцячы сад-СШ Дар’і Юцовай (на здымку).
Ідэя прыняць удзел у конкурсе належала настаўніцы беларускай мовы і літаратуры Антаніне Макаравай.
— Антаніна Аляксандраўна — настаўніца вышэйшай катэгорыі. Выкладае свой прадмет на высокім прафесійным узроўні, стараецца зацікавіць дзяцей роднай мовай і літаратурай, прывіць любоў да роднага краю, паказаць прыгажосць, мілагучнасць беларускага слова, — гаворыць дырэктар школы Вольга Сулім. — Вучні заўсёды з ахвотаю ўдзельнічаюць у розных конкурсах, віктарынах. Вось і на гэты раз творчыя работы Дар’і Юцовай прынеслі асабіста ёй і школе чарговую перамогу. Адзначаны быў малюнак “Сымон-музыка”.
Урачыстае ўзнагароджванне адбылося ў Цэнтральнай навуковай бібліятэцы імя Якуба Коласа Нацыянальнай акадэміі навук Беларусі. Даша атрымала прыз сімпатыі гледачоў і падзяку за сваю работу. Акрамя таго, яе работа ўвойдзе ў фонд бібліятэкі, а зараз яна яшчэ знаходзіцца на часовай экспазіцыі ў музеі Якуба Коласа.
Алена ІВАНОВА.