У мастацкай галерэі раённага краязнаўчага музея праходзіць выстава “Зачараванне правінцыяй”
Пазнаёміцца з новымі работамі Яўгена Шунейкі і ўбачыць на іх знаёмыя мясціны можна на выставе ў мастацкай галерэі раённага краязнаўчага музея.
Прафесар Беларускай акадэміі мастацтваў Яўген Шунейка прадставіў у Мар’інай Горцы чарговую выставу пад назвай “Зачараванне правінцыяй”. Мастацкая галерэя раённага краязнаўчага музея — адна з любімых пляцовак мастака.
— Правінцыя — крыніца культуры і, разам з тым, чароўны свет, дзе ёсць гісторыя, рамантыка, каларыт, — падкрэсліў Яўген Феліксавіч падчас адкрыцця экспазіцыі. — Невыпадкова гэтую выставу я прысвяціў невялікім гарадам і пасёлкам роднай краіны і замежжа.
На адкрыцці выставы прысутнічалі школьнікі, мастак Фёдар Ладуцька і вучаніца Яўгена Феліксавіча Дар’я Раманенка. Дырэктар раённага краязнаўчага музея Аляксандр Прановіч уручыў Яўгену Шунейку грамату за значны асабісты ўклад у дзейнасць мастацкай галерэі раённага краязнаўчага музея. Мастак таксама падрыхтаваў сюрпрыз для першых наведвальнікаў: інсталяцыю ў выглядзе інтэрактыўный гульні. Яшчэ адна прыемная навіна: напрыканцы выставы ўсе карціны папоўняць фонд краязнаўчага музея.
…З цікавасцю ўглядаюся ў экспазіцыю. Перш за ўсё звяртаю ўвагу на год напісання — усе работы новыя. На карцінах я пазнала Каложскую царкву ў Гродне, Аўгустоўскі канал, Салігорскія горы, сядзібу Бонч-Асмалоўскіх у Блоні. А якія мясціны пазнаеце вы? Наведайце мастацкую галерэю. Выстава будзе працаваць да пачатку чэрвеня.
Кацярына ВЕРНІКОЎСКАЯ.
