У Мар’інагорскай дзіцячай школе мастацтваў прайшоў развітальны баль
Выпускніцы харавога аддзялення Яўгенія Уласенкова і Аляксандра Пракапец.
Які ён, развітальны школьны баль, даведаліся і выпускнікі дзіцячых школ мастацтваў. Прыгожыя сукенкі дзяўчат, нейкая асаблівая постаць ў юнакоў, хваляванне настаўнікаў і бацькоў, кветкі, слёзы і адначасова радасныя ўсмешкі — усё гэта прысутнічала на ўрачыстасці, прысвечанай чарговаму выпуску ў Мар’інагорскай дзіцячай школе мастацтваў, якую ў гэтым годзе скончылі 56 вучняў.
Як расказала дырэктар установы адукацыі Алена Гурская, выпуск атрымаўся вельмі цікавы. У ім шмат выдатнікаў, лаўрэатаў і пераможцаў разнастайных конкурсаў. Сярод асабліва тытулаваных выпускнікоў яна адзначыла Аляксандра Антановіча (фартэпіяна) і Любоў Цэхановіч (цымбалы).
На працягу вечара выпускнікі адзін за адным падымаліся на сцэну, каб атрымаць свой першы ў жыцці дакумент аб адукацыі. Цёплыя пажаданні яны пачулі ад кіраўнікоў аддзяленняў, настаўнікаў, бацькоў. Асабліва актыўныя вучні атрымалі граматы, а бацькі — падзякі ад установы адукацыі.
Пасля заканчэння ўрачыстасці выпускнікі падзяліліся сваімі планамі. Некаторыя з іх плануюць застацца ў творчых калектывах школы. Ёсць і тыя, хто выбраў мастацтва ў якасці сваёй прафесіі і будзе спрабаваць паступіць у профільныя навучальныя ўстановы. Ім школа па-сапраўднаму дала пуцёўку ў жыццё.
Наталля ПАРХОМЧЫК.
