Прафсаюзныя лідары павіншавалі ўдзельнікаў жніва
Намеснік старшыні Мінскага абкама прафсаюза работнікаў АПК Пётр Окунеў павіншаваў удзельнікаў жніва. Сур’ёзнае стаўленне да працы і самааддача — вось што аб’ядноўвае ўсіх работнікаў, якія атрымалі падзячныя лісты і грашовыя прэміі ад прафсаюза.
Пра Наталлю Ляпешка, загадчыцу склада сельгасфіліяла “Светлая ніва”, мы пачулі шмат добрых слоў ад кіраўніцтва гаспадаркі яшчэ да нашай су-стрэчы. Наталля Аляксандраўна дзесяць гадоў працуе ў сельгасарганізацыі. Цяпер вядзе ўлік зерня, якім паступова запаўняюцца засекі.
Для Наталлі Ляпешка візіт прафсаюзнага лідара быў нечаканым, як і для трактарыста-машыніста Уладзіміра Галубцова. Трынаццаць гадоў таму ён пераехаў на Пухавіччыну з Салігорскага раёна. У сельгасфіліяле Уладзіміра Валер’евіча характарызуюць з самага лепшага боку.
Старшыня райкама прафсаюза работнікаў АПК Анастасія Арахоўская ўручыла падарунак дырэктару сельгасфіліяла Дзмітрыю Шынкарэнку з нагоды дня яго нараджэння. Дзмітрый Аляксандравіч — самы малады сярод кіраўнікоў сельгас-арганізацый у нашым раёне: яму споўнілася 25 гадоў.
У сапраўднае свята ператварылася цырымонія віншавання лепшых у ААТ “Ражджэственскае-Агра”. Дождж, які прайшоў напярэдадні, не пускаў камбайнераў на палеткі, таму знайшоўся час і для невялічкай канцэртнай праграмы ад ансамбля “Весялуха” Турынскага СДК.
Пётр Окунеў уручыў падзяку машыністу зернесушыльнага комплекса Уладзіміру Малішэўскаму.
Віншаванні атрымаў і самы малады экіпаж гаспадаркі — Віталь Ленскі і Ілля Макаранка. Віталь на камбайне працуе другі сезон. Для Іллі гэты год — дэбютны ў якасці памочніка. Ураджайнасць у гаспадарцы не высокая — у сярэднім 20 цэнтнераў з гектара, але камбайнеры разлічваюць наблізіцца да тысячнага намалоту. На дадзены момант яны займаюць другое месца ў сельгасарганізацыі.
А першымі тысячнікамі сталі Сяргей Ніпарко і Андрэй Капскі, сярод вадзіцеляў — Сяргей Лаўрыненка. Яны атрымалі падзякі і прэміі ад прафкама сельгасарганізацыі.
Кацярына ДАБРЫЦКАЯ.