Вырашаць праблемы вяскоўцаў
Тэлефон Вольгі Брусочкінай ведаюць усе жыхары аграгарадка Сяргеевічы. Не гараць ліхтары на вуліцы, няма тэлефоннай сувязі або не вывозяць смецце — па самых розных пытаннях людзі звяртаюцца да суседкі. Вольга Сяргееўна не толькі актыўны чалавек, але і стараста аграгарадка. Другі раз яе выбралі дэпутатам Навапольскага сельсавета.
Старастай жанчына стала нядаўна. Дагэтуль шмат гадоў гэтыя абавязкі выконваў Мікалай Сачышын. У Сяргеевічах Вольга Брусочкіна жыве больш за трыццаць гадоў, і гэты факт, безумоўна, дапамагае ў працы.
— Людзі мяне ведаюць, таму з імі прасцей мець зносіны. Разам з тым адчуваю адказнасць: хочацца ўсім дапамагчы вырашыць складаныя пытанні, — гаворыць Вольга Сяргееўна. — У Сяргеевічах пражывае больш за 300 чалавек. На лета прыязджаюць дачнікі, клопатаў становіцца больш.
Часцей за ўсё жыхары Сяргеевіч звяртаюцца да старасты з пытаннямі, звязанымі з жыллёва-камунальнай гаспадаркай. Жанчына стараецца аператыўна звязацца з работнікамі камунальнага прад-прыемства і як мага хутчэй вырашыць праблемы.
Сельсавет знаходзіцца ў Наваполлі — каля сямнаццаці кіламетраў ад Сяргеевіч. У кіраўніцтва сельвыканкама не заўсёды атрымліваецца прыехаць, таму стараста — надзейны сувязны паміж вяскоўцамі і адміністрацыяй. Вользе Брусочкінай расказваць аб праблемах жыхароў прасцей, чым іншым старастам: яна на палову стаўкі працуе ў сельвыканкаме справаводам. Усё жыццё Вольга Сяргееўна працуе з людзьмі: дагэтуль 25 гадоў была бібліятэкарам у Сяргеевіцкай бібліятэцы.
Стараста — праца на грамадскіх пачатках. Звычайна на гэтую пасаду прызначаюць уважлівага, адказнага і энергічнага чалавека. Вольга Брусочкіна з такой кагорты. Яна нікому не можа адмовіць у просьбе. Часта і ўвечары, пасля работы, ідзе да людзей. Ведае: абяцала прыйсці, і вяскоўцы чакаюць.
Кацярына ДАБРЫЦКАЯ.