Абмяркоўвалі актуальныя тэмы
Традыцыйны дзень інфармавання насельніцтва быў прысвечаны актуальным тэмам, звязаным з аховай прыродных рэсурсаў і іх беражлівым выкарыстаннем, а таксама са станам спраў па супрацьдзеянні незаконнаму абароту наркотыкаў на тэрыторыі Мінскай вобласці.
Гэтыя пытанні з прадстаўнікамі камунальнага прадпрыемства УП “Жылцепласэрвіс” КГ абмеркаваў генеральны дырэктар ГА “Камунальнік” Мінскай вобласці Васіль Шашок (на здымку справа з дырэктарам УП “Жылцепласэрвіс” КГ Іосіфам Кучко і намеснікам старшыні райвыканкама Андрэем Крэменем).
Першая тэма асабліва актуальная і цікавая для камунальнікаў, таму што работа прадпрыемства звязана з выкарыстаннем прыродных рэсурсаў, а таксама са зборам і ўтылізацыяй адходаў. Васіль Васільевіч прывёў некалькі лічбаў, якія тычацца здабычы і спажывання вады і карысных выкапняў. Напрыклад, да 2030 года чалавецтву спатрэбіцца на 50 працэнтаў больш харчавання і на 30 працэнтаў больш вады, чым сёння. А ў сувязі з ростам насельніцтва і развіццём сусветнай эканомікі да 2035 года глабальнае спажыванне энергіі вырасце прыкладна на 50 працэнтаў. Усё гэта сведчыць пра вастрыню праблем зберажэння і рацыянальнага выкарыстання прыродных рэсурсаў. Тое, што мы сёння зберажом, дапаможа нам выжыць заўтра.
Для нагляднасці былі прыведзены больш блізкія і зразумелыя лічбы, якія характарызуюць дзейнасць нашага камунальнага прадпрыемства. З прыкладна трох мільёнаў кубаметраў паднятай вады УП “Жылцепласэрвіс” КГ губляе па розных прычынах каля 17 працэнтаў. За год магло б атрымацца цэлае возера. Гэта недапушчальны працэнт страт, нягледзячы на тое, што ён нашмат ніжэйшы, чым быў яшчэ некалькі гадоў таму. Але і яго яшчэ трэба змяншаць. Як і займацца пытаннямі энергазберажэння ў кожным падраздзяленні прадпрыемства, на кожным працоўным месцы.
Больш актыўна трэба весці работу і па зборы другаснай сыравіны.
Інфармацыю па другім пытанні, звязаным з абаротам наркатычных рэчываў, кожны чалавек хацеў бы чуць у тэарэтычнай плоскасці. Але гэтая хвароба не дае нікому падставы для самазаспакаення. Нягледзячы на дасягнутыя ў 2017 годзе вынікі, сітуацыя, што складваецца на тэрыторыі вобласці ў гэтым годзе, не вельмі аптымістычная: канстатавана павелічэнне на 13 працэнтаў агульнай колькасці выяўленых злачынстваў, у тым ліку на 27,2 працэнта — збыту наркотыкаў.
Намеснік старшыні райвыканкама Андрэй Крэмень, які прысутнічаў на дні інфармавання, чыста па-чалавечы параіў кожнаму абавязкова пагаварыць з дзецьмі або ўнукамі як пра тое, што пакаранне за падобныя злачынствы становіцца больш жорсткім з кожным годам і вымяраецца гадамі зняволення ў калоніях і турмах, так і пра тое, што адбываецца з наркаманамі неўзабаве пасля пачатку прыёму наркотыкаў. Пераканаўчых відэа сёння шмат.
Сустрэча, прымеркаваная да дня інфармавання, завяршылася рашэннем рабочых і асабістых пытанняў.
Алена ШАНТЫКА.