Адбылося ўшанаванне пераможцаў маладзёжнага конкурсу “Моладзь Міншчыны — за ўраджай”
Міхаіл Булгак, Аляксандр Блахін і Павел Навічыхін.
У сталічным забаўляльным боўлінг—цэнтры “Madison” адбылося ўшанаванне пераможцаў маладзёжнага конкурсу “Моладзь Міншчыны — за ўраджай”. Арганізатары мерапрыемства вырашылі заахвоціць моладзь турнірам па боўлінгу. Сярод 22 каманд — лідараў жніва за тытул лепшай змагалася і каманда Пухавіцкага раёна.
Камбайнеры ААТ “Зазерка” Міхаіл Булгак і Павел Навічыхін, а таксама вадзіцель ААТ “Племянны завод “Індустрыя” Аляксандр Блахін упершыню трапілі на турнір, але гульня ў іх ладзілася. Падтрымлівалі нашых хлебаробаў старшыня райкама прафсаюза работнікаў АПК Людміла Ленкавец і першы сакратар РК ГА “БРСМ” Аляксандра Стош.
Абласны турнір прайшоў у восьмы раз. За гэты час мерапрыемства ператварылася ў своеасаблівую сустрэчу маладых аграрыяў, дзе яны могуць абмеркаваць і надзённыя прафесійныя пытанні. Усе лідары ўборачнай кампаніі атрымалі дыпломы ад арганізатараў і грашовыя прэміі.
Кацярына ДАБРЫЦКАЯ.
