Аграрыі Пухавіцкага раёна закладваюць аснову пад будучы ўраджай
З наступленнем зімы работы на палетках сельскагаспадарчых арганізацый раёна не спыніліся. Ужо цяпер аграрыі закладваюць аснову пад будучы ўраджай — актыўна займаюцца вывазам арганічных угнаенняў на палі. Добра арганізаваны гэты від работ у сельгасфіліяле “Чырвоны май”, дзе сфарміравана працоўнае звяно.
У гаспадарцы нарыхтавана 7 тысяч 300 тон арганікі. Амаль 6,5 тысячы тон ужо вывезена на палі. Пад яравыя культуры восенню ўнеслі 3 тысячы тон арганічных угнаенняў. Астатнюю частку будуць уносіць вясной будучага года. Унясенне арганікі спрыяе павелічэнню колькасці перагною, а гэта, у сваю чаргу, — развіццю мікраарганізмаў у глебе.
— Як паказала практыка папярэдніх гадоў, на нашых землях найбольш эфектыўна ўносіць арганіку пад кукурузу, — гаворыць галоўны аграном Віктар Несін. — Да вясенняй пасяўной часткова мы ўжо гатовыя. Усю неабходную плошчу зааралі з восені. Насенне таксама ўжо падрыхтавана.
Вывазам удабрэнняў аграрыі сельгасфіліяла актыўна заняліся пасля завяршэння корманарыхтоўчай кампаніі. Работы ў асноўным вядуцца каля комплексу “Блужа” і фермы ў Арэшкавічах. У Блужы ў панядзелак мы і сустрэлі працоўнае звяно. На новым “Амкадоры”, які набылі летам, амаль бесперапынна працуе Дзмітрый Касцецкі.
— З шасці гадзін раніцы я ўжо на ферме. Трэба карміць жывёлу. Гэта абавязковая штодзённая праца, таму выхадных цяпер няма, — гаворыць Дзмітрый Касцецкі, які ў гаспадарку прыйшоў па прыкладзе бацькі. У сельгасфіліяле Дзмітрый Ігаравіч працуе ўжо восем гадоў.
Адзін за адным да пагрузчыка пад’язджаюць трактары. На двух энерганасычаных трактарах “Беларус-3022” працуюць Андрэй Булгак і Віталь Паскробка. На адвозцы арганікі задзейнічаны таксама Сяргей Буторын і Іван Прановіч. Апошняму нядаўна даверылі новы “Беларус-82,1”. Тэхніку механізатары лічаць галоўным складнікам паспяховай работы.
Усе працуюць зладжанай камандай. Калі неабходна, да працоўнага звяна далучаюцца іншыя механізатары.
Усяго ў раёне нарыхтавана 228 тысяч тон арганічных угнаенняў. На палі вывезена больш за 200 тысяч тон арганікі.
Кацярына ДАБРЫЦКАЯ.