Алена Артановіч: «Падзяліць працу і асабістае жыццё проста немагчыма»
Алена Якаўлеўна Артановіч, загадчыца Голацага фельчарска-акушэрскага пункта, з упэўненасцю кажа, што і яна, і яе калегі, якія працуюць на ФАПах і жывуць у сельскай мясцовасці, у нейкі момант пачынаюць разумець, што падзяліць працу і асабістае жыццё проста немагчыма.
— Ты не заўважаеш, як становішся вінцікам нейкага механізму, — кажа Алена Якаўлеўна. — І таму нават не можаш узяць адэкватны перапынак на адпачынак, бо людзям заўсёды неабходна дапамога: я шэсць дзён на тыдзень працую на ФАПе, выязджаю ў вёскі па выкліках, але і ў святочныя дні заўсёды знаходзіцца работа. Згадзіцеся, што хвароба або недамаганне не здараюцца па раскладзе. Таму людзі звяртаюцца да мяне ў любы час. Я заўсёды імкнуся зразумець, бо мы столькі гадоў жывём побач адзін з адным.
Алена Якаўлеўна працуе на Голацкім ФАПе з 1997 года,а ў медыцыне — з 1984 года.
Абслугоўвае сёння больш за 1000 чалавек, якія пражываюць у гэтым рэгіёне. 7 вёсак, школа і дзіцячы сад (больш за 200 дзяцей) — усё гэта кола абавязкаў фельчара, якая аказвае пацыентам першую дапамогу пры прастудах, траўмах, іншых хваробах, а таксама накіроўвае на кансультацыі да вузкіх спецыялістаў. За столькі гадоў людзі навучыліся давяраць свайму «доктару» і з любымі праблемамі ў першую чаргу спяшаюцца да яе.
— Мы жывём адной сям’ёй, — кажа Алена Артановіч. — І тут, на вёсцы, без гэтага ніяк: вельмі важна ўзаемадапамога. Трэба, напрыклад, камусьці лекі, а даехаць да аптэкі (яна ёсць і на ФАПе) або па рэцэпт — праблема. Дапаможа хтосьці з пацыентаў або сяброў. А то і проста чужы чалавек, які з нагоды едзе ў патрэбны населены пункт. Ці, напрыклад, трэба тэрмінова даехаць у аддаленую вёску па выкліку, а транспарту няма. Прыйдзе на дапамогу кіраўніцтва сельгаспрадпрыемства або іншыя добрыя людзі. Але ў асноўным я карыстаюся веласіпедам. Гэта наша «хуткая дапамога»…
Каля Голацкага ФАПа, размешчанага ў цэнтры пасёлка, заўсёды чыста, дагледжана. Пра гэта таксама клапоціцца фельчар. Яна не ўяўляе, што можна крытыкаваць за беспарадак іншага, а самому не звяртаць увагі на падобныя рэчы.
Алена Якаўлеўна кажа, што нягледзячы на пастаянную загружанасць, ненарміраваны працоўны дзень і шмат іншых няпростых фактараў, без якіх не бывае медыцыны, усё роўна вельмі любіць сваю работу. Не ўяўляе таму, што яе новы дзень можа пачацца неяк па-іншаму, а не з дарогі на ФАП…
Алена ШАНТЫКА.