Ансамбль “Фіялкі” атрымаў званне “ўзорны”
У гісторыі ансамбля “Фіялкі” Рудзенскай дзіцячай школы мастацтваў 2019 год ужо заняў адметнае месца: калектыў атрымаў званне “ўзорны”.
Усё пачалося ў 2005 годзе. Вучні, якія займаліся па класе цымбал, аб’ядналіся ў творчы калектыў. Паколькі большасць яго заўсёды складалі дзяўчынкі, назву яму прыдумалі адпаведную — “Фіялкі”. Першыя ўдзельнікі ансамбля былі па-сапраўднаму ўлюбёнымі ў цымбалы — інструмент з неверагоднымі магчыма-сцямі і багатай гісторыяй. І так адбываецца ўжо на працягу чатырнаццаці гадоў: усе, хто прыходзіць у калектыў, з вялікай павагай адносяцца да інструмента, імкнуцца дасканала авалодаць выканаўчай тэхнікай.
Цымбалы заслугоўваюць павагу. Іх гісторыя пачынаецца яшчэ ў старажытнай Месапатаміі. Прайшоўшы доўгі шлях, інструмент з’явіўся ў Заходняй Еўропе, а ў XV стагоддзі — на тэрыторыі Беларусі. Музыканты ацанілі не толькі самастойнае гучанне цымбалаў, якія былі прыгоднымі для выканання самай разнастайнай музыкі, але і тое, як яны “працуюць” у ансамблі з другімі інструментамі. У XVIII стагоддзі кампазітары пачалі ўводзіць цымбалы ў партытуру оперных спектакляў. На працягу часу інструмент пастаянна мадэрнізаваўся. Так у 1925 годзе было створана цэлае сямейства цымбалаў: пікала, прыма, альт, бас і кантрабас. На нашай тэрыторыі цымбалы хутка заваявалі народную любоў. І паступова сталі адным з сімвалаў Беларусі. Таму ігра на гэтым інструменце — справа адказная.
Гэта добра ведаюць удзельнікі ансамбля цымбалістаў “Фіялкі”. Іх агульныя рысы — працаздольнасць і імкненне асвоіць нават вельмі складаныя творы. У скарбонцы нашага калектыву класіка, народная музыка і музыка сучасных кампазітараў. Я імкнуся так падбіраць рэпертуар, каб ён прыносіў асалоду і выканаўцам, і слухачам.
У рудзенскай зоне добра ведаюць наш калектыў, нярэдка за-прашаюць прыняць удзел у разнастайных святочных канцэртах. Удзельнічаем мы і ў конкурсах самага рознага ўзроўню. Назваць іх можна шмат: арт-фестываль “Чорная жамчужына”, адкрыты конкурс маладых выканаўцаў “Мая мара”, конкурс “Беларускія таленты”, міжнародны фестываль-конкурс “Паверхі”, фестываль мастацтваў “BYFEST” і іншыя. Ансамбль выступаў на конкурсных сцэнах Расіі, Польшчы, Чэхіі. І даволі паспяхова. За апошнія гады калектыў сабраў унушальную калекцыю ўзнагарод, у якой ёсць дыпломы лаўрэатаў усіх ступеняў, Гран-пры некаторых конкурсаў.
Сёння ўдзельнікамі калектыву “Фіялкі” з’яўляюцца Ульяна Лабецкая, Карына Калугіна, Аляксандра Пашына, Аляксандра Ляпіч, Дар’я Дабрадзей, Яна Храмая, Дар’я Прыёмка, Вячаслаў Косак, Іван Храмы. Усе яны здольныя і мэтанакіраваныя. Ім цікава рухацца наперад. Яны добра ўсведамляюць, што з’яўляюцца членамі адзінага ў раёне дзіцячага інструментальнага ансамбля, які мае ганаровае званне “ўзорны”, і гатовы трымаць гэтую высокую планку.
Лілія ФУРС,
кіраўнік ансамбля цымбалістаў “Фіялкі”.