Дарожнае пытанне не перастае хваляваць жыхароў раёна
Стан дарог у населеных пунктах — тая праблема, пра якую найчасцей гаварылі жыхары розных населеных пунктаў старшыні райвыканкама Віктару Каляда падчас “прамой тэлефоннай лініі” і прыёма грамадзян у Блонскім сельвыканкаме.
Дзмітрый з Голацка напомніў, што ўжо звяртаўся да старшыні райвыканкама з нагоды падсыпкі дарогі на адной з вуліц Голацка. Ён падзякаваў за тое, што гэта даручэнне кіраўніка раёна было выканана. І зноў папрасіў на гэты раз звярнуць увагу на крытычныя ямы, якія ўтварыліся пасля зімы на дарозе, што звязвае Голацк з Зазер’ем.
Жыхар Блоні Андрэй на прыёме расказаў пра праблемы вуліцы Магістральная ў аграгарадку. Па ёй цяжкая тэхніка мясцовага сельгаспрадпрыемства ад фермы, што знаходзіцца недалёка, вывозіць на палі арганіку і ў веснавы перыяд значна разбівае гравійку. Жыхары вуліцы не раз самі падсыпалі дарогу. Але ў час бездарожжа ўсё паўтараецца. Просьба жыхароў — абмежаваць рух сельскагаспадарчай тэхнікі па вуліцы Магістральная.
Віктар Міхайлавіч патэлефанаваў кіраўніку сельгаспрадпрыемства і пацікавіўся, ці існуюць іншыя шляхі для вывазу арганікі. У тэлефоннай размове былі абмеркаваны ўсе магчымыя варыянты. “Арганіку па вуліцы Магістральнай не вывазіць”, — такім стала даручэнне старшыні райвыканкама.
Але грамадзяніна папярэдзілі, што для іншых мэт дарога сельгаспрадпрыемствам выкарыс-тоўвацца будзе. Напрыклад, калі прыйдзе пара закладваць сілас. Гэтыя работы праводзяцца ў іншых умовах надвор’я, і тэхніка не наносіць значны ўрон дарожнаму пакрыццю. Таксама было дадзена даручэнне зараз прывесці дарогу на вуліцы Магістральная ў парадак.
Наталля ПАРХОМЧЫК.
