Кіраўнік справамі Прэзідэнта Рэспублікі Беларусь Віктар Шэйман уручыў падарункі выхаванцам Рудзенскай спецыялізаванай школы-інтэрната
Удзельнікамі рэспубліканскай дабрачыннай акцыі “Нашы дзеці” штогод становяцца выхаванцы Рудзенскай спецыялізаванай школы-інтэрната. Большасць з іх не маюць бацькоўскай любові і ўвагі, але вера ў цуд жыве ў кожным дзіцячым сэрцы.
Як веснікі дабрыні да дзяцей 27 снежня завіталі галоўны Дзед Мароз сталіцы са Снягуркай. Шмат падарункаў прывезлі і госці. Кіраўнік справамі Прэзідэнта Рэспублікі Беларусь Віктар Шэйман трэці год віншуе выхаванцаў з навагоднімі святамі. Агульны карагод вакол прыгожай ёлкі аб’яднаў дзяцей і дарослых.
Віктар Шэйман падзякаваў за добрасумленную працу выхаванцам школы-інтэрната і педагогам. На працягу года ў розных спаборніцтвах яны заваявалі 41 залаты медаль. За спартыўныя дасягненні Віктар Уладзіміравіч адзначыў Дзмітрыя Шаўрука, за поспехі ў дэкаратыўна-прыкладным мастацтве — Кацярыну Дземідовіч.
У пачатку года па ініцыятыве шэфаў — Упраўлення справамі Прэзідэнта Рэспублікі Беларусь — выхаванцы школы-інтэрната наведалі Белавежскую пушчу. Некаторыя дзеці паспелі адпачыць за мяжой — у Італіі, Францыі, Бельгіі, наведалі Санкт-Пецярбург і Маскву. Сёлета шэфы таксама дапамагалі з добра-ўпарадкаваннем школы-інтэрната. Нядаўна былі закуплены новыя ложкі.
У 2019 годзе дзяцей чакае экскурсія ў Бярэзінскі біясферны запаведнік і на возера Нарач. Але гэта былі не ўсе падарункі ад гасцей. Па навагодняй традыцыі дзеці атрымалі цукеркі і спартыўны абутак.
Хлопчыкі і дзяўчынкі таксама не пакінулі гасцей без падарункаў: уручылі ім сувеніры, зробленыя сваімі рукамі.
Гэты святочны ранішнік быў для дзяцей не першым. Напярэдадні Рудзенскую школу-інтэрнат наведалі прадстаўнікі раённага выканаўчага камітэта, аб’яднаных прафсаюзных арганізацый і іншыя госці.
Кацярына ВЕРНІКОЎСКАЯ.