На Пухавіччыне прайшоў конкурс юных чытальнікаў
У мастацкай галерэі раённага краязнаўчага музея гучалі радкі Якуба Коласа. Вершы народнага песняра, урыўкі з паэм “Новая зямля” і “Міхасёвы прыгоды” чыталі вучні 5-7-х класаў з розных школ раёна. Вучні сталі ўдзельнікамі конкурсу чытальнікаў, арганізатарамі якога выступілі раённы краязнаўчы музей і ўпраўленне па адукацыі, спорце і турызме райвыканкама. Так завяршыліся традыцыйныя “Каласавіны”, якія праходзілі ў раёне на працягу ўсяго лістапада.
Праходзіў конкурс у зале мастацкай галерэі, дзе размясцілася выстава “Таямніцы беларускай сялянскай хаты”. Гэта было ідэальнае месца для правядзення такога мерапрыемства. На высокім узроўні настаўнікі беларускай мовы і літаратуры падрыхтавалі ўдзельнікаў конкурсу. Эпітэт “цудоўны” ў гэты раз падыходзіў да ўсяго: і да падбору твораў, і да іх выканання, і да таго, як гучала родная мова. Адбылася прыгожая літаратурная вечарына, на якой выканаўцы вельмі пранікнёна чыталі вершаваныя радкі беларускага класіка, а слухачы з цікаўнасцю іх успрымалі.
Верш чытае Карына Камлюк з Азярычынскага НПК дзіцячы сад-сярэдняя школа.
Журы прыйшлося вельмі няпроста, бо выбіраць ім давялося не столькі лепшых, колькі першых сярод роўных. У выніку ўсім юным чытальнікам уручылі дыпломы ўдзельнікаў і буклеты пра Якуба Коласа ад раённага краязнаўчага музея. Спецыяльныя прызы ад цэнтральнай раённай бібліятэкі атрымалі пяцікласнікі Захар Пракапчук з Ананіцкага навучальна-педагагічнага комплексу дзіцячы сад-сярэдняя школа і Кацярына Ланец з Дубраўскай сярэдняй школы, ад рэдакцыі газеты “Пухавіцкія навіны” — вучань 5 класа сярэдняй школы №4 горада Мар’іна Горка Павел Пляскач і вучаніца 6 класа Азярычынскага навучальна-педагагічнага комплексу дзіцячы сад-сярэдняя школа Карына Камлюк. Дыпламантам III ступені стала вучаніца 7 класа сярэдняй школы №3 горада Мар’іна Горка Таццяна Качэргіна, II ступені — Дар’я Лозка з Дукорскага навучальна-педагагічнага комплексу дзіцячы сад-сярэдняя школа. А самым запамінальным на конкурсе стала выступленне вучня 5 класа Азярычынскага навучальна-педагагічнага комплексу дзіцячы сад-сярэдняя школа Іллі Граблюка: верш “Савось-распуснік” у яго выкананні не пакінуў абыякавым нікога. Ён і стаў пераможцам.
Дыпломы і падарункі атрымалі і настаўнікі беларускай мовы і літаратуры, якія падрыхтавалі пераможцаў: Алена Закрэўская з Азярычынскага НПК дзіцячы сад-сярэдняя школа, Наталля Крукоўская з Дукорскага НПК дзіцячы сад-сярэдняя школа і Ірына Зянько з сярэдняй школы №3 горада Мар’іна Горка.
Наталля ВАСІЛЬЕВА.
