На Пухавіччыне завяршаецца акцыя «Для славы агульнай Перамогі”
На фінішную прамую выходзіць міжнародная акцыя “Для славы агульнай Перамогі”, якая прымеркавана да 75-годдзя заканчэння Вялікай Айчыннай вайны. У Мар’інай Горцы прайшоў яе раённы этап.
У Беларусі акцыя пачалася ў жніўні 2019 года. Да яе далучыліся ўсе рэгіёны краіны, у тым ліку і наш раён.
За мінулы час члены раённага і мясцовых выканаўчых камітэтаў, прадстаўнікі грамадскіх арганізацый, моладзь і святары наведалі месцы, дзе пахаваны героі Вялікай Айчыннай вайны і яе ахвяры, каб адтуль узяць зямлю. На раённым этапе яе змясцілі ў спецыяльныя капсулы.
Урачыстая цырымонія прайшла на мінулым тыдні на Алеі Славы ў Мар’інай Горцы. У ёй прынялі ўдзел намеснік старшыні раённага выканаўчага камітэта Наталля Чарнышова, настаяцель кафедральнага сабора святога дабравернага князя Аляксандра Неўскага пратаіерэй Аляксандр Цалкоў, прадстаўнікі грамадскасці горада.
Зямлю з месцаў пахавання герояў у капсулу змясцілі члены раённай арганізацыі грамадскага аб’яднання “Беларускі рэспубліканскі саюз моладзі”. Яны — нашчадкі Вялікай Перамогі. Ім у далейшым захоўваць і аберагаць памяць аб подзвігах герояў вайны.
Галоўнай часткай цырымоніі стаў агульны малебен, пасля якога айцец Аляксандр асвяціў капсулу з зямлёй з месцаў воінскіх пахаванняў. У далейшым яе перададуцць у Храм-Помнік у гонар Усіх Святых для закладкі ў нішу крыпты. Плануецца, што ўрачыстая цырымонія з гэтай нагоды пройдзе 9 мая.
Наталля ПАРХОМЧЫК.
