Напярэдадні Дня жанчын галоўную матчыну ўзнагароду атрымала Анастасія Галка з аграгарадка Наваполле
24 лютага 2023 года Прэзідэнтам Беларусі падпісаны Указ № 56 аб узнагароджанні шмат-дзетных жанчын ордэнам Маці. Узнагароды атрымаюць, як паведамляе прэс-служба Прэзідэнта, 206 жыхарак усіх абласцей краіны і горада Мінска.
За нараджэнне і выхаванне пяці і больш дзяцей узнагароды ўдастоены прадстаўніцы самых розных сфер дзейнасці.
Прыемна ўсведамляць, што сярод узнагароджаных ёсць і наша зямлячка: напярэдадні Дня жанчын 8 Сакавіка галоўную матчыну ўзнагароду атрымае Анастасія Галка з аграгарадка Наваполле.
Анастасія — карэнная пухавіччанка. Тут нарадзілася, тут скончыла Грэбенскую школу, тут знайшла свайго будучага мужа. Хаця, уласна кажучы, як знайшла? Нават моцна старацца не трэба было: вучыліся з Аляксандрам у адным класе. Вяселле згулялі ў хуткім часе пасля заканчэння школы. І вось ужо больш за 15 гадоў у шлюбе. За гэты час у сям’і нарадзілася пяцёра хлапчукоў. Старэйшаму Мацвею 15 гадоў, а малодшаму Марку сёлета споўніцца два.
— Пра тое, што наша сям’я стане шматдзетнай, мы не думалі, — шчыра кажа Анастасія. — Але што гэта такое, ведаем добра, таму што ў маёй мамы трое дзяцей, а ў сям’і мужа — пяцёра. Пасля таго, як нарадзіліся першыя сыны, мы спачатку марылі аб дачцэ. Але нарадзіліся хлапчукі. І зараз ужо не ўяўляем, як было б па-другому.
Яны ўсе цудоўныя. Розныя па характары, захапленнях. Да кожнага патрэбен свой падыход. Але мы ўмеем знаходзіць агульную мову.
Мяне часам пытаюцца аб тым, ці цяжка быць шматдзетнай мамай. Скажу так: мне не цяжка. Калі ты любіш дзяцей, яны дораць табе вялізную радасць і шчасце.
Сям’я Галка жыве ва ўласным добраўпарадкаваным доме, пабудаваным з дзяржпадтрымкай. Ён для такой сям’і стаў цяпер крыху малаваты, таму нядаўна адзначылі яшчэ адно наваселле: пабудавалі кватэру ў сацыяльным доме. Праўда, мяняць месца жыхарства не плануюць. Проста думаюць на крок наперад, бо дзеці падрастаюць.
Гаворачы аб узнагароджанні ордэнам Маці, Анастасія не хавае таго, што ў гэтай сувязі прысутнічае хваляванне. Што казаць: гэта ганаровае званне, гэта прызнанне важнасці мацярынскай працы, і гэта безумоўны гонар за сваю сям’ю…
Алена ІВАНОВА.