Настаўніца Мар’інагорскай гімназіі ганарыцца сваімі вучнямі

Настаўніцу нямецкай мовы Мар’інагорскай гімназіі Таццяну Гарошка добра ведаюць многія педагогі раёна. І кожны, я ўпэўнена, скажа, што цяжка ўявіць кагосьці, больш улюбёнага ў свой прадмет, у сваю прафесію і дзяцей. Я пагаджуся з гэтым, бо таксама асабіста ведаю гэтага чалавека ўжо шмат гадоў, на працягу якіх назіраю, як крок за крокам яна разам са сваімі вучнямі ідзе наперад…

Я добра памятаю той час, калі нямецкая мова пачала ў якасці эксперымента вывучацца гімназістамі як другая замежная мова (паралельна з англійскай). А потым год за годам усё больш заваёўвала ўвагу вучняў. Асабліва тады, калі па ініцыятыве Таццяны Мікалаеўны былі ўстаноўлены сяброўскія сувязі з гімназіяй  Марцінеум, і нашы гімназісты ўпершыню пабывалі ў Германіі. А потым не раз сустракалі на Пухавіччыне нямецкіх гімназістаў. Праект ажыццяўляецца ўжо 10 гадоў, і цікавасць да вывучэння нямецкай мовы толькі расце. Таму не дзіўна, што  цяпер гімназісты паказваюць на прадметных алімпіядах, конкурсах і на цэнтралізаваным тэсціраванні цудоўныя вынікі. Напрыклад, Марыя Кадземік пры паступленні набрала 96 балаў, а Надзея Андык  нядаўна атрымала дыплом 3-й ступені на абласным этапе рэспубліканскай алімпіяды па нямецкай мове.

У настаўніцы ёсць яшчэ адна нагода, каб ганарыцца сваімі вучнямі: некаторыя з іх выбралі для сябе такую ж прафесію. Выкладаюць нямецкую мову Ганна Кузуб, Юлія Паршына, Вікторыя Кулакевіч, Аліна Панова. На выдатна скончылі магістратуру па нямецкай мове Анастасія Андык і Паліна Рысевец, якая засталася выкладаць ва ўніверсітэце. І гэта не ўсе былыя вучні Таццяны Мікалаеўны, хто заўсёды з жаданнем і ўдзячнасцю спяшаецца да сваёй настаўніцы. У мінулую суботу многія з іх прыйшлі ў гімназію на вечар сустрэчы выпускнікоў. І гэта сустрэча была вельмі радаснай.

Алена   ІВАНОВА.