Падрыхтаваны новы выпуск літаратурна-мастацкага альманаха “Созвучие: Россия—Беларусь”
Да Дня беларускага пісьменства, які сёлета пройдзе на Брэстчыне ў горадзе Іванава, кніжныя выдавецтвы рыхтуюць розныя праекты. Выходзяць новыя кнігі прозы і паэзіі, кнігі перакладаў на беларускую мову. Выдавецтва “Мастацкая літаратура”, імкнучыся пашырыць прадстаўленне беларускай літаратуры ў свеце, падрыхтавала новы выпуск літаратурна-мастацкага альманаха “Созвучие: Россия—Беларусь”. Чацвёрты па ліку зборнік, які знаёміць і з беларускай літаратурай на рускай мове, і з літаратурамі іншых краін, таксама на рускай мове, адкрые для чытача многа імён і многа твораў ужо вядомых аўтараў.
З беларускіх пісьменнікаў у “Созвучии” выступаюць Казімір Камейша, Сяргей Трахімёнак, Валянціна Паліканіна, Віктар Гардзей, Віктар Праўдзін, Георгій Марчук.
Досыць цікавай падаецца геаграфія публікацый пісьменнікаў Расіі. З аповесцю выступае Валерый Казакоў, які, праўда, калі так можна сказаць, жыве на дзве краіны — у Расіі і Беларусі. “Созвучие” друкуе вершы нагайскага паэта з Дагестана Анварбека Култаева, башкірскай паэтэсы Зульфіі Хананавай, народных паэтаў Татарстана Роберта Мінуліна і Рэната Харыса, чачэнскіх пісьменнікаў Лулы Куна і Адама Ахматукаева.
— Мы імкнуліся паказаць шырокую палітру нацыянальных літаратур у Расіі, — расказвае адзін з укладальнікаў альманаха паэт Віктар Шніп. — Канешне ж, ахапіць усе літаратуры народаў Расіі немагчыма ў адным выданні. Ды і не да ўсіх сёння дацягнешся нават у электронных стасунках. Тым не менш, такім чынам мы выбудоўваем мост сяброўства, дэкларуем, што Беларусь літаратурная з’яўляецца добрай камунікатыўнай пляцоўкай для рэалізацыі розных праектаў. Дарэчы, ведаю, што імёны шмат каго з аўтараў нашага альманаха добра знаёмы чытачу і ў звязку з публікацыямі гэтых аўтараў па-беларуску. Вось у восьмым нумары часопіса “Маладосць” надрукавана паэма Зульфіі Хананавай у перакладзе Марыі Кобец. Вершы Анварбека Култаева перакладае Мікола Мятліцкі. Творы Лулы Куна і Адама Ахматукаева толькі што былі змешчаны ў падборцы чачэнскай паэзіі і прозы ў часопісе “Полымя”. У Мінску выйшлі дзве паэтычныя кнігі татарскага паэта Роберта Мінуліна. Адзін са зборнікаў — у серыі нашага выдавецтва “Сябрына: паэзія народаў Расіі”.
Алесь КАРЛЮКЕВІЧ.